ബീഹാർ തെരഞ്ഞെടുപ്പ്: മുസ്ലീങ്ങൾക്ക് ഉപമുഖ്യമന്ത്രിസ്ഥാനം എന്തുകൊണ്ട് നൽകിക്കൂടാ എന്ന് ഒവൈസി

പട്‌ന: മുസ്ലീം സമുദായത്തോടുള്ള ആര്‍ജെഡിയുടെയും കോണ്‍ഗ്രസിന്റെയും പെരുമാറ്റത്തെ വിമര്‍ശിച്ച് എഐഎംഐഎം നേതാവും എംപിയുമായ അസദുദ്ദീന്‍ ഒവൈസി. ആരെയും പേരെടുത്ത് പറയാതെ, മുസ്ലീങ്ങള്‍ 'വാതില്‍ക്കല്‍ നിന്ന് ചെരിപ്പ് ഊരിമാറ്റാന്‍ നിര്‍ബന്ധിക്കുന്ന' നേതാക്കള്‍ക്ക് വോട്ട് ചെയ്യുന്നുണ്ടെന്ന് ഒവൈസി പറഞ്ഞു.

അത്തരം നേതാക്കളെ വിശ്വസിക്കരുതെന്ന് അദ്ദേഹം മുസ്ലീങ്ങളോട് അഭ്യര്‍ത്ഥിക്കുകയും സമൂഹ വികസനത്തിന് സ്വന്തം നേതൃത്വത്തിന്റെ ആവശ്യകതയെ ഊന്നിപ്പറയുകയും ചെയ്തു.

മുകേഷ് സഹാനിയുടെ സമുദായത്തിന് 3.5% വോട്ടുകള്‍ മാത്രമുള്ളപ്പോള്‍ അദ്ദേഹത്തെ ഉപമുഖ്യമന്ത്രിയായി നിയമിച്ചതിനെക്കുറിച്ചും ഒവൈസി ചോദ്യം ഉന്നയിച്ചു. മഹാസഖ്യത്തിന് മുസ്ലീം ഉപമുഖ്യമന്ത്രിയെ പ്രഖ്യാപിക്കാന്‍ കഴിയാത്തത് എന്തുകൊണ്ടാണെന്ന് ഒവൈസി ചോദിച്ചു. 

മുസ്ലീങ്ങള്‍ തങ്ങളുടെ ശക്തി തിരിച്ചറിഞ്ഞ് എ.ഐ.എം.ഐ.എമ്മിന് വോട്ട് ചെയ്യണമെന്ന് അദ്ദേഹം അഭ്യര്‍ത്ഥിച്ചു, സമുദായത്തെ നേരിട്ട് പ്രതിനിധീകരിക്കുന്ന ഒരു നേതൃത്വത്തിന്റെ ആവശ്യകത എടുത്തുകാണിച്ചു.

സീറ്റ് വിഭജനവും സഖ്യ സാധ്യതകളും ചര്‍ച്ച ചെയ്യാന്‍ ലാലു പ്രസാദ് യാദവിന് താന്‍ വ്യക്തിപരമായി കത്തെഴുതിയിരുന്നുവെന്നും എന്നാല്‍ ആര്‍ജെഡി നേതൃത്വം അനുകൂലമായി പ്രതികരിച്ചില്ലെന്നും ഒവൈസി പറഞ്ഞു. 

ഇതിനെക്കുറിച്ച് ചോദിച്ചപ്പോള്‍, കത്തിനെക്കുറിച്ച് തനിക്ക് അറിയില്ലെന്ന് തേജസ്വി യാദവ് അവകാശപ്പെട്ടതായി റിപ്പോര്‍ട്ടുണ്ട്. ലാലു പ്രസാദിന് കത്തെഴുതിയതിനുശേഷവും മകന് പ്രത്യേക കത്ത് അയയ്‌ക്കേണ്ടിവരുമെന്ന് പ്രതീക്ഷിച്ചിരുന്നില്ലെന്നും ഇത് ആര്‍ജെഡിക്കുള്ളിലെ ഏകോപനക്കുറവിനെ സൂചിപ്പിക്കുന്നുവെന്ന് ഒവൈസി അഭിപ്രായപ്പെട്ടു.