ഇന്ത്യയുടെ ഓപ്പറേഷന്‍ സിന്ദൂര്‍ തീവ്രവാദ അടിസ്ഥാന സൗകര്യങ്ങള്‍ക്ക് ഗുരുതരമായ നാശനഷ്ടങ്ങള്‍ വരുത്തിയെന്ന് സമ്മതിച്ച് ലഷ്‌കര്‍-ഇ-തൊയ്ബ നേതാവ്

ഡല്‍ഹി: ഇന്ത്യയുടെ ഓപ്പറേഷന്‍ സിന്ദൂര്‍ തീവ്രവാദ അടിസ്ഥാന സൗകര്യങ്ങള്‍ക്ക് ഗുരുതരമായ നാശനഷ്ടങ്ങള്‍ വരുത്തിയെന്ന് പരോക്ഷമായി സമ്മതിച്ച് പാകിസ്ഥാന്‍ ആസ്ഥാനമായുള്ള ഭീകര സംഘടനയായ ലഷ്‌കര്‍-ഇ-തൊയ്ബ (എല്‍ഇടി) യുടെ മുതിര്‍ന്ന നേതാവ് സൈഫുള്ള കസൂരി.

അതേസമയം ന്യൂഡല്‍ഹിക്കെതിരെ പൊള്ളയായ പ്രസ്താവനകളും ഇയാള്‍ പുറപ്പെടുവിച്ചു. ആയിരക്കണക്കിന് എല്‍ഇടി അനുയായികള്‍ പങ്കെടുത്ത ഒരു പൊതുയോഗത്തിലാണ് ഈ പരാമര്‍ശം. 

എല്‍ഇടി തലവന്‍ ഹാഫിസ് സയീദിന്റെ അടുത്ത സഹായിയും പഹല്‍ഗാം ഭീകരാക്രമണത്തിലെ പ്രധാന വ്യക്തിയുമായ സൈഫുള്ള കസൂരി, ഓപ്പറേഷന്‍ സിന്ദൂരിനിടെ തീവ്രവാദ ഒളിത്താവളങ്ങള്‍ ലക്ഷ്യമിട്ട് ഇന്ത്യ 'തെറ്റ് ചെയ്തു' എന്ന് അവകാശപ്പെട്ടു. സംഘം കശ്മീരില്‍ ശ്രദ്ധ കേന്ദ്രീകരിക്കുന്നത് തുടരുമെന്ന് പ്രഖ്യാപിച്ചു.

'ഞങ്ങളുടെ കശ്മീര്‍ ദൗത്യത്തില്‍ നിന്ന് ഞങ്ങള്‍ ഒരിക്കലും പിന്നോട്ട് പോകില്ല,' സൈഫുള്ള കസൂരി പറഞ്ഞു. 

ഏപ്രില്‍ 22-ന് പഹല്‍ഗാമില്‍ നടന്ന ഭീകരാക്രമണത്തെക്കുറിച്ചും കസൂരി പരാമര്‍ശിച്ചു. പാകിസ്ഥാനിലെ പഞ്ചാബ് പ്രവിശ്യയില്‍ നടന്ന ഒരു പ്രത്യേക റാലിയില്‍ സംസാരിക്കവെ, ആക്രമണത്തിന് പിന്നിലെ സൂത്രധാരനായി പ്രഖ്യാപിക്കപ്പെട്ടതോടെ താന്‍ 'പ്രശസ്തനായി' മാറിയെന്ന് സൈഫുള്ള കസൂരി അവകാശപ്പെട്ടു.

പാകിസ്ഥാന്‍ പിന്തുണയുള്ള ഭീകരരാണ് ആക്രമണം നടത്തിയതെന്ന് ഇന്ത്യന്‍ ഏജന്‍സികള്‍ ആവര്‍ത്തിച്ച് വ്യക്തമാക്കിയിട്ടുണ്ട്.