ഇന്ത്യാ സന്ദർശനത്തിനിടെ സംയുക്ത പ്രസ്താവന നടത്തിയതിന് അഫ്ഗാൻ സ്ഥാനപതിയെ പാകിസ്ഥാൻ വിളിച്ചുവരുത്തി

ഡല്‍ഹി: ന്യൂഡല്‍ഹിയില്‍ ഒരു ദിവസം മുമ്പ് പുറത്തിറക്കിയ ഇന്ത്യ-അഫ്ഗാനിസ്ഥാന്‍ സംയുക്ത പ്രസ്താവനയില്‍ തങ്ങളുടെ ശക്തമായ എതിര്‍പ്പ് അറിയിക്കാന്‍ പാകിസ്ഥാന്‍ അഫ്ഗാന്‍ അംബാസഡറെ വിളിച്ചുവരുത്തി.

വ്യാഴാഴ്ച ന്യൂഡല്‍ഹിയില്‍ വിമാനമിറങ്ങിയ അഫ്ഗാന്‍ വിദേശകാര്യ മന്ത്രി അമീര്‍ ഖാന്‍ മുത്താക്കി ആറ് ദിവസത്തെ ഇന്ത്യാ സന്ദര്‍ശനത്തിലാണ്.

സംയുക്ത പ്രസ്താവനയില്‍ ജമ്മു കശ്മീരിനെക്കുറിച്ചുള്ള പരാമര്‍ശങ്ങളില്‍ പാകിസ്ഥാന്റെ ശക്തമായ എതിര്‍പ്പ് അഫ്ഗാന്‍ പ്രതിനിധിയെ അഡീഷണല്‍ വിദേശകാര്യ സെക്രട്ടറി അറിയിച്ചതായി വിദേശകാര്യ ഓഫീസ് പ്രസ്താവനയില്‍ പറഞ്ഞു.

'ജമ്മു കശ്മീരിനെ ഇന്ത്യയുടെ ഭാഗമായി പരാമര്‍ശിക്കുന്നത് പ്രസക്തമായ യുഎന്‍ സുരക്ഷാ കൗണ്‍സില്‍ പ്രമേയങ്ങളുടെ വ്യക്തമായ ലംഘനമാണെന്ന് അറിയിച്ചു...' വിദേശകാര്യ ഓഫീസ് പറഞ്ഞു.

ഏപ്രിലില്‍ ജമ്മു കശ്മീരിലെ പഹല്‍ഗാമില്‍ നടന്ന ഭീകരാക്രമണത്തെ അഫ്ഗാനിസ്ഥാന്‍ ശക്തമായി അപലപിക്കുകയും ഇന്ത്യന്‍ ജനതയോടും സര്‍ക്കാരിനോടും അനുശോചനവും ഐക്യദാര്‍ഢ്യവും പ്രകടിപ്പിക്കുകയും ചെയ്തതായി സംയുക്ത പ്രസ്താവനയില്‍ പറയുന്നു. മേഖലയില്‍ സമാധാനം, സ്ഥിരത, പരസ്പര വിശ്വാസം എന്നിവ പ്രോത്സാഹിപ്പിക്കേണ്ടതിന്റെ പ്രാധാന്യം ഇരുപക്ഷവും അടിവരയിട്ടു പറഞ്ഞു. പ്രാദേശിക രാജ്യങ്ങളില്‍ നിന്ന് ഉയര്‍ന്നുവരുന്ന എല്ലാ ഭീകരപ്രവര്‍ത്തനങ്ങളെയും അവര്‍ അസന്ദിഗ്ധമായി അപലപിച്ചു.

ഭീകരവാദം പാകിസ്ഥാന്റെ ആഭ്യന്തര പ്രശ്‌നമാണെന്ന മുത്തഖിയുടെ വാദവും ഇസ്ലാമാബാദ് തള്ളി. ഭീകരത നിയന്ത്രിക്കുന്നതിനുള്ള ഉത്തരവാദിത്തം പാകിസ്ഥാനിലേക്ക് മാറ്റുന്നത്, പ്രാദേശിക സമാധാനവും സ്ഥിരതയും ഉറപ്പാക്കാനുള്ള അഫ്ഗാന്‍ ഇടക്കാല സര്‍ക്കാരിനെ അതിന്റെ ബാധ്യതകളില്‍ നിന്ന് ഒഴിവാക്കില്ലെന്ന് പ്രസ്താവന പറഞ്ഞു.

പാകിസ്ഥാന്റെ ദീര്‍ഘകാല ആതിഥ്യമര്യാദയെ എടുത്തുകാണിച്ചുകൊണ്ട്, നാല് പതിറ്റാണ്ടിലേറെയായി ഏകദേശം നാല് ദശലക്ഷം അഫ്ഗാനിസ്ഥാന്‍ അഭയം നല്‍കിയിട്ടുണ്ടെന്ന് എഫ്ഒ പറഞ്ഞു. അഫ്ഗാനിസ്ഥാനില്‍ സമാധാനം തിരിച്ചുവന്നതോടെ, രാജ്യത്ത് താമസിക്കുന്ന അനധികൃത അഫ്ഗാന്‍ പൗരന്മാര്‍ നാട്ടിലേക്ക് മടങ്ങണമെന്ന് പാകിസ്ഥാന്‍ ആവര്‍ത്തിച്ചു.