'പാകിസ്ഥാൻ ഭീകര പ്രവർത്തനങ്ങൾക്ക് പിന്തുണ നൽകുന്നു, സ്വന്തം പരാജയങ്ങൾക്ക് അയൽക്കാരെ കുറ്റപ്പെടുത്തുന്നു': അഫ്ഗാൻ-പാക് സംഘർഷങ്ങളിൽ ഇന്ത്യ

ഡല്‍ഹി: അഫ്ഗാനിസ്ഥാനുമായുള്ള സമീപകാല ശത്രുതയെക്കുറിച്ച് പാകിസ്ഥാനെ രൂക്ഷമായി വിമര്‍ശിച്ച് വിദേശകാര്യ മന്ത്രാലയം. സ്വന്തം ആഭ്യന്തര പരാജയങ്ങള്‍ക്ക് അയല്‍ക്കാരെ കുറ്റപ്പെടുത്തുന്നത് ഇസ്ലാമാബാദിന്റെ പഴയ രീതിയാണെന്ന് പറഞ്ഞു.

'അഫ്ഗാനിസ്ഥാന്റെ പരമാധികാരം, പ്രദേശിക സമഗ്രത, സ്വാതന്ത്ര്യം എന്നിവയില്‍ ഇന്ത്യ പൂര്‍ണ്ണമായും പ്രതിജ്ഞാബദ്ധമാണെന്ന്' ഒരു പത്രസമ്മേളനത്തില്‍ വിദേശകാര്യ വക്താവ് രണ്‍ധീര്‍ ജയ്സ്വാള്‍ പറഞ്ഞു.

 'മൂന്ന് കാര്യങ്ങള്‍ വ്യക്തമാണ് - ഒന്ന്, പാകിസ്ഥാന്‍ തീവ്രവാദ സംഘടനകളെ പിന്തുണയ്ക്കുകയും തീവ്രവാദ പ്രവര്‍ത്തനങ്ങള്‍ക്ക് പിന്തുണ നല്‍കുകയും ചെയ്യുന്നു, രണ്ട്, സ്വന്തം ആഭ്യന്തര പരാജയങ്ങള്‍ക്ക് അയല്‍ക്കാരെ കുറ്റപ്പെടുത്തുന്നത് പാകിസ്ഥാന്റെ പഴയ രീതിയാണ്. 'മൂന്നാമതായി, സ്വന്തം പ്രദേശങ്ങളില്‍ അഫ്ഗാനിസ്ഥാന്‍ പരമാധികാരം പ്രയോഗിക്കുന്നതില്‍ പാകിസ്ഥാന്‍ രോഷാകുലരാണ്,' അദ്ദേഹം കൂട്ടിച്ചേര്‍ത്തു.

പാകിസ്ഥാനും അഫ്ഗാനിസ്ഥാനും തമ്മില്‍ അതിര്‍ത്തിയില്‍ ഉണ്ടായ സംഘര്‍ഷങ്ങളില്‍ ഇരു രാജ്യങ്ങളിലുമായി ഡസന്‍ കണക്കിന് ആളുകള്‍ കൊല്ലപ്പെടുകയും നൂറുകണക്കിന് പേര്‍ക്ക് പരിക്കേല്‍ക്കുകയും ചെയ്തു.

2021-ല്‍ പാശ്ചാത്യ പിന്തുണയുള്ള സര്‍ക്കാരിന്റെ തകര്‍ച്ചയെത്തുടര്‍ന്ന് താലിബാന്‍ അഫ്ഗാനിസ്ഥാനില്‍ അധികാരം പിടിച്ചെടുത്തതിനുശേഷം, അയല്‍ക്കാര്‍ക്കിടയിലുള്ള ഏറ്റവും വലിയ പ്രതിസന്ധിയാണിത്. ഒക്ടോബര്‍ 10 മുതല്‍ അതിര്‍ത്തി കടന്നുള്ള അക്രമം വര്‍ദ്ധിച്ചു, ഓരോ രാജ്യവും പരസ്പരം സായുധ പ്രകോപനങ്ങള്‍ക്ക് തിരിച്ചടി നല്‍കുകയാണെന്ന് പറഞ്ഞു. 

അഫ്ഗാന്‍ സേനയുടെ കൈകളില്‍ നിന്ന് തങ്ങളുടെ സൈന്യത്തിന് കനത്ത നഷ്ടം സംഭവിച്ച സാഹചര്യത്തില്‍, പാകിസ്ഥാന്‍ ബുധനാഴ്ച അഫ്ഗാനിസ്ഥാനുമായി 48 മണിക്കൂര്‍ വെടിനിര്‍ത്തല്‍ പ്രഖ്യാപിച്ചു.

'സങ്കീര്‍ണ്ണവും എന്നാല്‍ പരിഹരിക്കാവുന്നതുമായ ഈ പ്രശ്‌നത്തിന് ക്രിയാത്മകമായ ഒരു പരിഹാരം കണ്ടെത്താന്‍ ഇരുപക്ഷവും ആത്മാര്‍ത്ഥമായ ശ്രമങ്ങള്‍ നടത്തുമെന്ന്' പാകിസ്ഥാന്‍ വിദേശകാര്യ ഓഫീസ് പ്രസ്താവനയില്‍ പറഞ്ഞു.