ഇനി എന്തു സംഭവിക്കും? ഇന്ത്യയുടെ പ്രതികാരനടപടിയെ ഭയന്ന് പാകിസ്ഥാന്‍. ഇസ്ലാമാബാദിലെ പാര്‍ലമെന്റ് ഹൗസില്‍ ദേശീയ അസംബ്ലിയുടെ യോഗം വിളിച്ചുചേര്‍ത്ത് പ്രസിഡന്റ്

ജമ്മു: ജമ്മു കശ്മീരിലെ പഹല്‍ഗാമില്‍ നടന്ന ഭീകരാക്രമണത്തിന് ശേഷം ഇന്ത്യയും പാകിസ്ഥാനും തമ്മിലുള്ള സംഘര്‍ഷം രൂക്ഷമാകുന്നു .

ഇന്ത്യയുടെ പ്രത്യാക്രമണം ഏത് നിമിഷവും ഉണ്ടാകുമെന്ന ആശങ്കകള്‍ക്കിടെ പാകിസ്ഥാന്‍ പ്രസിഡന്റ് ആസിഫ് അലി സര്‍ദാരി പാര്‍ലമെന്റിന്റെ അടിയന്തര സമ്മേളനം വിളിച്ചു. തിങ്കളാഴ്ച വൈകുന്നേരം 5 മണിക്കാണ് സമ്മേളനം. ശനിയാഴ്ച അര്‍ദ്ധരാത്രിയാണ് സര്‍ദാരി ഈ തീരുമാനമെടുത്തത്. 

2025 മെയ് 5 തിങ്കളാഴ്ച വൈകുന്നേരം 5:00 മണിക്ക് ഇസ്ലാമാബാദിലെ പാര്‍ലമെന്റ് ഹൗസില്‍ പ്രസിഡന്റ് ദേശീയ അസംബ്ലിയുടെ ഒരു യോഗം വിളിച്ചുചേര്‍ത്തിരിക്കുന്നുവെന്ന് പാകിസ്ഥാന്‍ സര്‍ക്കാര്‍ പുറത്തിറക്കിയ ഔദ്യോഗിക പ്രസ്താവനയില്‍ പറയുന്നു.

ഇന്ത്യയും പാകിസ്ഥാനും തമ്മിലുള്ള വഷളായിക്കൊണ്ടിരിക്കുന്ന നയതന്ത്ര ബന്ധത്തെക്കുറിച്ചായിരിക്കും വരാനിരിക്കുന്ന സെഷനില്‍ പ്രധാനമായും ചര്‍ച്ച ചെയ്യുക എന്നാണ് റിപ്പോര്‍ട്ടുകള്‍. 

സിന്ധു നദീജല ഉടമ്പടി താല്‍ക്കാലികമായി നിര്‍ത്തിവയ്ക്കാനുള്ള ഇന്ത്യയുടെ സമീപകാല തീരുമാനത്തിന് പ്രത്യേക ഊന്നല്‍ നല്‍കും.

 ഇന്ത്യയുടെ നടപടിക്ക് മറുപടിയായി ദേശീയ അസംബ്ലിയുടെ നടപടിക്രമങ്ങളില്‍ പാകിസ്ഥാന്‍ സര്‍ക്കാര്‍ 'ശക്തമായ അപലപന' പ്രമേയം അവതരിപ്പിക്കാന്‍ തയ്യാറെടുക്കുകയാണെന്ന് പാകിസ്ഥാന്‍ മാധ്യമങ്ങള്‍ റിപ്പോര്‍ട്ട് ചെയ്യുന്നു.