ഭാര്യ ആത്മഹത്യ ചെയ്ത കേസിൽ മഹാരാഷ്ട്ര മന്ത്രി പങ്കജ മുണ്ടെയുടെ പിഎ അനന്ത് ഗാർജെ അറസ്റ്റിൽ

മുംബൈ: മഹാരാഷ്ട്ര മന്ത്രി പങ്കജ മുണ്ടെയുടെ പിഎയുടെ ഭാര്യയുടെ ആത്മഹത്യാ കേസില്‍ പിഎ അനന്ത് ഗാര്‍ജെ അറസ്റ്റിലായി. അനന്തിന് വിവാഹേതര ബന്ധമുണ്ടെന്നും യുവതിയെ ഇയാള്‍ പീഡിപ്പിച്ചുവെന്നും മരിച്ച ഗൗരിയുടെ കുടുംബം ആരോപിച്ചു. 

തിങ്കളാഴ്ച രാവിലെ 11 മണിക്ക് ശേഷം അനന്തിനെ കോടതിയില്‍ ഹാജരാക്കും. ശനിയാഴ്ച വോര്‍ലിയിലെ വസതിയില്‍ ഭാര്യ ഗൗരി ആത്മഹത്യ ചെയ്തതിനെ തുടര്‍ന്ന് മുംബൈ പോലീസ് അനന്ത് ഗാര്‍ജെയ്ക്കെതിരെ കേസ് രജിസ്റ്റര്‍ ചെയ്തിരുന്നു. 

സംഭവത്തില്‍ വിശദമായ അന്വേഷണം ആരംഭിച്ചതായും പീഡനം, ഗാര്‍ഹിക പീഡനം എന്നീ ആരോപണങ്ങള്‍ അധികൃതര്‍ പരിശോധിച്ചതായും റിപ്പോര്‍ട്ടുണ്ട്.

സിവില്‍ ഉടമസ്ഥതയിലുള്ള കെഇഎം ആശുപത്രിയില്‍ ദന്ത വിഭാഗത്തില്‍ ജോലി ചെയ്തിരുന്ന ഗൗരിയെ വീടിനുള്ളില്‍ തൂങ്ങിമരിച്ച നിലയിലാണ് കണ്ടെത്തിയത്. അനന്ത് ഗാര്‍ജെയും ഗൗരിയും ഈ വര്‍ഷം ഫെബ്രുവരിയിലാണ് വിവാഹിതരായത്.

സംഭവസ്ഥലത്ത് നിന്ന് ആത്മഹത്യാക്കുറിപ്പൊന്നും കണ്ടെത്തിയിട്ടില്ലെന്നും മരണവുമായി ബന്ധപ്പെട്ട എല്ലാ സാധ്യതകളും പരിശോധിച്ചുവരികയാണെന്നും പോലീസ് പറഞ്ഞു.