ഹിമാചൽ പ്രദേശ്: ബിർ ബില്ലിംഗിൽ പാരാഗ്ലൈഡിംഗ് അപകടത്തിൽ പൈലറ്റ് മരിച്ചു, വിനോദസഞ്ചാരിക്ക് പരിക്ക്; അന്വേഷണത്തിന് ഉത്തരവിട്ടു

കാംഗ്ര: ഹിമാചല്‍ പ്രദേശിലെ കാംഗ്ര ജില്ലയിലെ ബിര്‍ ബില്ലിംഗ് പാരാഗ്ലൈഡിംഗ് സൈറ്റില്‍ പറന്നുയര്‍ന്നതിന് തൊട്ടുപിന്നാലെ ഒരു ടാന്‍ഡം പാരാഗ്ലൈഡര്‍ സാങ്കേതിക തകരാര്‍ സംഭവിച്ച് വിക്ഷേപണ സ്ഥലത്തിന് സമീപം തകര്‍ന്നുവീണു.

അപകടത്തില്‍ പൈലറ്റ് മരിച്ചു. മാണ്ഡി ജില്ലയിലെ ബറോട്ടില്‍ താമസിക്കുന്ന മോഹന്‍ സിംഗ് എന്നയാളാണ് കൊല്ലപ്പെട്ടതെന്ന് ഉദ്യോഗസ്ഥര്‍ പറഞ്ഞു. ലോകത്തിന്റെ പാരാഗ്ലൈഡിംഗ് തലസ്ഥാനം എന്നറിയപ്പെടുന്ന ബിര്‍ ബില്ലിംഗ് ലോഞ്ച് സൈറ്റില്‍ നിന്ന് വെള്ളിയാഴ്ച വൈകുന്നേരം ടാന്‍ഡം പാരാഗ്ലൈഡര്‍ പറന്നുയര്‍ന്നു കഴിഞ്ഞപ്പോഴാണ് സംഭവം.

എന്നാല്‍, പറന്നുയര്‍ന്നതിന് തൊട്ടുപിന്നാലെ, വായുവില്‍ ബാലന്‍സ് നഷ്ടപ്പെട്ടതിനെ തുടര്‍ന്ന് പാരാഗ്ലൈഡര്‍ വിക്ഷേപണ സ്ഥലത്തിന് സമീപം തകര്‍ന്നുവീണു. പാരാഗ്ലൈഡറിന് സാങ്കേതിക തകരാര്‍ സംഭവിച്ചതായി ബിര്‍ ബില്ലിംഗ് പാരാഗ്ലൈഡിംഗ് അസോസിയേഷന്‍ ഉദ്യോഗസ്ഥര്‍ പറഞ്ഞു.

സംഭവത്തെത്തുടര്‍ന്ന് പൈലറ്റിനെയും ഒപ്പമുണ്ടായിരുന്ന വിനോദസഞ്ചാരിയെയും നാട്ടുകാരും രക്ഷാപ്രവര്‍ത്തകരും ചേര്‍ന്ന് അടുത്തുള്ള ആശുപത്രിയില്‍ എത്തിച്ചെങ്കിലും സിംഗ് മരിച്ചു. 

വിനോദസഞ്ചാരിക്കും ചില പരിക്കുകള്‍ ഉണ്ടായെങ്കിലും പ്രഥമശുശ്രൂഷ നല്‍കിയ ശേഷം അപകടനില തരണം ചെയ്തതായി ഉദ്യോഗസ്ഥര്‍ പറഞ്ഞു. 

സംഭവത്തിന്റെ കൃത്യമായ കാരണവും സാങ്കേതിക തകരാറോ, മനുഷ്യ പിഴവോ, കാലാവസ്ഥയുമായി ബന്ധപ്പെട്ട ഘടകങ്ങളോ ആണോ സംഭവിച്ചതെന്ന് കണ്ടെത്തുന്നതിനായി കേസ് രജിസ്റ്റര്‍ ചെയ്ത് അന്വേഷണം ആരംഭിച്ചതായി ഉദ്യോഗസ്ഥര്‍ പറഞ്ഞു.