പാര്‍ലമെന്റ് ശീതകാല സമ്മേളനം: വരാനിരിക്കുന്ന സമ്മേളനത്തില്‍ അദാനി ഗ്രൂപ്പിനെതിരായ ആരോപണങ്ങള്‍, മണിപ്പൂര്‍ പ്രതിസന്ധി, വായു മലിനീകരണം എന്നീ വിഷയങ്ങള്‍ക്ക് മുന്‍ഗണന നല്‍കണമെന്ന് കോണ്‍ഗ്രസ്

ഡല്‍ഹി: 2024-ലെ പാര്‍ലമെന്റിന്റെ ശീതകാല സമ്മേളനത്തിന് മുന്നോടിയായി അദാനി ഗ്രൂപ്പിനെതിരായ കൈക്കൂലി ആരോപണങ്ങള്‍, മണിപ്പൂരിലെ നിലവിലെ പ്രതിസന്ധി, ഉത്തരേന്ത്യയിലെ കടുത്ത മലിനീകരണം, വര്‍ദ്ധിച്ചുവരുന്ന ട്രെയിന്‍ അപകടങ്ങള്‍ എന്നിവ ഉള്‍പ്പെടെ നിരവധി സുപ്രധാന വിഷയങ്ങളില്‍ ചര്‍ച്ച നടത്തണെന്ന് ആഹ്വാനം ചെയ്ത് കോണ്‍ഗ്രസ്.

നവംബര്‍ 24 ഞായറാഴ്ച നടന്ന സര്‍വകക്ഷി യോഗത്തിലാണ് കോണ്‍ഗ്രസ് ഈ ആവശ്യങ്ങള്‍ ഉന്നയിച്ചത്. വരാനിരിക്കുന്ന സമ്മേളനത്തില്‍ ഈ വിഷയങ്ങള്‍ക്ക് മുന്‍ഗണന നല്‍കണമെന്ന് കോണ്‍ഗ്രസ് നേതാവ് പ്രമോദ് തിവാരി സര്‍ക്കാരിനോട് ആവശ്യപ്പെട്ടു.

അദാനി ഗ്രൂപ്പിനെതിരെയുള്ള കൈക്കൂലി ആരോപണം

കോണ്‍ഗ്രസ് ഉയര്‍ത്തിയ ഒരു പ്രധാന വിഷയം അദാനി ഗ്രൂപ്പിനെതിരെ അടുത്തിടെ യുഎസ് പ്രോസിക്യൂട്ടര്‍മാര്‍ കൊണ്ടുവന്ന കൈക്കൂലി ആരോപണമാണ്. സോളാര്‍ എനര്‍ജി പദ്ധതികള്‍ക്ക് അനുകൂലമായ ഇടപാടുകള്‍ക്കായി രാഷ്ട്രീയക്കാര്‍ക്കും ഉദ്യോഗസ്ഥര്‍ക്കും കമ്പനി 2,300 കോടി രൂപ കൈക്കൂലി നല്‍കിയെന്നാണ് ആരോപണം.

ഇത് രാജ്യത്തിന്റെ സാമ്പത്തിക, സുരക്ഷാ താല്‍പ്പര്യങ്ങള്‍ ഉള്‍ക്കൊള്ളുന്നുവെന്ന് പ്രമോദ് തിവാരി എടുത്തുകാണിച്ചു. തിങ്കളാഴ്ച പാര്‍ലമെന്റ് വീണ്ടും ചേരുമ്പോള്‍ ഇക്കാര്യം ആദ്യ വിഷയമായി പരിഗണിക്കണമെന്ന് കോണ്‍ഗ്രസ് ആവശ്യപ്പെട്ടു.

കോടീശ്വരനായ ഗൗതം അദാനിയെ ഉടന്‍ അറസ്റ്റ് ചെയ്യണമെന്ന് ലോക്സഭയിലെ പ്രതിപക്ഷ നേതാവ് രാഹുല്‍ ഗാന്ധി നേരത്തെ ആവശ്യപ്പെട്ടിരുന്നു. നിയമപരമായ പ്രത്യാഘാതങ്ങളില്‍ നിന്ന് ഗൗതം അദാനിയെ പ്രധാനമന്ത്രി നരേന്ദ്ര മോദി സംരക്ഷിക്കുകയാണെന്ന് അദ്ദേഹം ആരോപിച്ചിരുന്നു.

ഇതിന് മറുപടിയായി, ഇന്ത്യന്‍ വിപണിയെ അസ്ഥിരപ്പെടുത്താനും സമ്പദ്വ്യവസ്ഥയെ തകര്‍ക്കാനും കോണ്‍ഗ്രസ് ശ്രമിക്കുന്നതായി ബിജെപിയും വിമര്‍ശിച്ചു. ആരോപണങ്ങളെക്കുറിച്ച് സംയുക്ത പാര്‍ലമെന്ററി സമിതി അന്വേഷിക്കണമെന്നും കോണ്‍ഗ്രസ് ആവശ്യപ്പെട്ടിട്ടുണ്ട്.

അദാനി അഴിമതിയെക്കുറിച്ചുള്ള ചര്‍ച്ചയ്ക്ക് പുറമേ സമീപ മാസങ്ങളില്‍ വംശീയ അക്രമം വര്‍ദ്ധിച്ച മണിപ്പൂരിലെ സാഹചര്യത്തെക്കുറിച്ച് അടിയന്തര ചര്‍ച്ചകള്‍ വേണമെന്നും കോണ്‍ഗ്രസ് ആവശ്യപ്പെട്ടു. ഉത്തരേന്ത്യയിലെ കടുത്ത വായു മലിനീകരണ പ്രതിസന്ധിയെ കുറിച്ചും അടുത്ത ആഴ്ചകളില്‍ വഷളായിക്കൊണ്ടിരിക്കുന്ന ട്രെയിന്‍ അപകടങ്ങളുടെ വര്‍ധനയെക്കുറിച്ചും പാര്‍ട്ടി ചര്‍ച്ചകള്‍ ആവശ്യപ്പെട്ടു.

പാര്‍ലമെന്റ് ശീതകാല സമ്മേളനം നവംബര്‍ 25 ന്

2024 നവംബര്‍ 25 ന് ആരംഭിക്കുന്ന ശീതകാല സമ്മേളനം ഡിസംബര്‍ 20 വരെ നടക്കുമെന്ന് പ്രതീക്ഷിക്കുന്നു. വഖഫ് (ഭേദഗതി) ബില്‍ ഉള്‍പ്പെടെ 16 ബില്ലുകള്‍ സര്‍ക്കാര്‍ പരിഗണനയ്ക്കായി നിര്‍ദ്ദേശിച്ചിട്ടുണ്ട്. പ്രതിപക്ഷ നേതാക്കള്‍ വഖഫ് ബില്ലുമായി ബന്ധപ്പെട്ട് ആശങ്ക പ്രകടിപ്പിച്ചിരുന്നു.