പാർലമെന്റിന്റെ ശീതകാല സമ്മേളനത്തിൽ ചണ്ഡീഗഡ് ഭരണകൂടത്തെക്കുറിച്ചുള്ള ബില്ലില്ലെന്ന് കേന്ദ്രം

ഡല്‍ഹി: ചണ്ഡീഗഡിനായുള്ള കേന്ദ്ര സര്‍ക്കാരിന്റെ നിയമനിര്‍മ്മാണ പ്രക്രിയ ലളിതമാക്കാനുള്ള നിര്‍ദ്ദേശം ഇപ്പോഴും പരിഗണനയിലാണെന്നും അന്തിമ തീരുമാനമെടുത്തിട്ടില്ലെന്നും ആഭ്യന്തര മന്ത്രാലയം (എംഎച്ച്എ) വ്യക്തമാക്കി. 

ചണ്ഡീഗഡിന്റെ ഭരണത്തെയോ ഭരണ ഘടനയെയോ മാറ്റാന്‍ പദ്ധതി ശ്രമിക്കുന്നില്ലെന്നും ചണ്ഡീഗഡിനും പഞ്ചാബ് അല്ലെങ്കില്‍ ഹരിയാന സംസ്ഥാനങ്ങള്‍ക്കും ഇടയിലുള്ള പരമ്പരാഗത ക്രമീകരണങ്ങള്‍ മാറ്റാനും ലക്ഷ്യമിടുന്നില്ലെന്നും സര്‍ക്കാര്‍ പറഞ്ഞു.

ചണ്ഡീഗഢിന്റെ താല്‍പ്പര്യങ്ങള്‍ മനസ്സില്‍ വെച്ചുകൊണ്ട്, എല്ലാ പങ്കാളികളുമായും മതിയായ കൂടിയാലോചനകള്‍ക്ക് ശേഷം മാത്രമേ കേന്ദ്രഭരണ പ്രദേശവുമായി ബന്ധപ്പെട്ട ഏതൊരു തീരുമാനവും എടുക്കുകയുള്ളൂവെന്ന് ആഭ്യന്തര മന്ത്രാലയം വ്യക്തമാക്കി. 

ആശങ്കപ്പെടേണ്ട ആവശ്യമില്ലെന്ന് കേന്ദ്ര സര്‍ക്കാര്‍ ഉറപ്പുനല്‍കുകയും വരാനിരിക്കുന്ന പാര്‍ലമെന്റിന്റെ ശീതകാല സമ്മേളനത്തില്‍ ഈ വിഷയത്തില്‍ ഒരു ബില്ലും അവതരിപ്പിക്കാന്‍ ഉദ്ദേശിക്കുന്നില്ലെന്ന് സ്ഥിരീകരിക്കുകയും ചെയ്തു.