പരസ്യം സ്വാഭാവികമായ ഒരു പ്രചാരണ രീതി': പതഞ്ജലിയുടെ തെറ്റിദ്ധരിപ്പിക്കുന്ന പരസ്യങ്ങളുടെ കേസ് സുപ്രീം കോടതി അവസാനിപ്പിച്ചു

ഡല്‍ഹി: പതഞ്ജലി ആയുര്‍വേദയുടെ തെറ്റിദ്ധരിപ്പിക്കുന്ന പരസ്യങ്ങള്‍ക്കെതിരെയുള്ള ഇന്ത്യന്‍ മെഡിക്കല്‍ അസോസിയേഷന്റെ (ഐഎംഎ) ഹര്‍ജി സുപ്രീം കോടതി അവസാനിപ്പിച്ചു.

പരസ്യം ചെയ്യുന്നത് സ്വാഭാവികമായ ഒരു ബിസിനസ് രീതിയാണെന്ന് ചൂണ്ടിക്കാട്ടിയാണ് നടപടി. കൂടുതല്‍ കര്‍ശനമായ പരിശോധനകളും അംഗീകാരങ്ങളും ആവശ്യപ്പെട്ടുകൊണ്ട് നേരത്തെ കോടതി പുറപ്പെടുവിച്ച ഉത്തരവ് ഇതോടെ റദ്ദാക്കി.

'നിങ്ങള്‍ നിര്‍മ്മാണത്തിന് അനുമതി നല്‍കിയാല്‍, ആ ഉല്‍പ്പന്നത്തിന്റെ പരസ്യം ഒരു സ്വാഭാവിക ബിസിനസ് രീതിയായിരിക്കും,' കേസ് അവസാനിപ്പിച്ചുകൊണ്ട് ജസ്റ്റിസ് ബി.വി. നാഗരത്‌ന പറഞ്ഞു.

കേന്ദ്ര സര്‍ക്കാരിന് വേണ്ടി ഹാജരായ സോളിസിറ്റര്‍ ജനറല്‍ തുഷാര്‍ മേത്ത, നിലവിലുള്ള നിയമങ്ങള്‍ തെറ്റായ മെഡിക്കല്‍ അവകാശവാദങ്ങള്‍ തടയുന്നുണ്ടെന്നും, അതിനാല്‍ റൂള്‍ 170 ആവശ്യമില്ലെന്നും വാദിച്ചു. 'ഇതിനകം തന്നെ നിയമപരമായ സംവിധാനം നിലവിലുണ്ട്...

സാധാരണക്കാരന്റെ ബുദ്ധിയെ നമ്മള്‍ സംശയിക്കരുത്,' അദ്ദേഹം പറഞ്ഞു. പരമ്പരാഗത വൈദ്യശാസ്ത്ര പരസ്യങ്ങള്‍ക്ക് മുന്‍കൂട്ടിയുള്ള അനുമതി ആവശ്യപ്പെടുന്നതാണ് റൂള്‍ 170.

വാദം കേള്‍ക്കുന്നതിനിടെ, ഇടക്കാല ഹര്‍ജിക്കാരനായ അഡ്വക്കേറ്റ് പ്രണവ് സച്ച്ദേവ, റൂള്‍ 170 ഒഴിവാക്കിക്കൊണ്ടുള്ള ആയുഷ് മന്ത്രാലയത്തിന്റെ വിജ്ഞാപനം സുപ്രീം കോടതി സ്റ്റേ ചെയ്തത് തുടരണമെന്ന് ആവശ്യപ്പെട്ടു.

തെറ്റിദ്ധരിപ്പിക്കുന്ന പരസ്യങ്ങളുടെ അപകടങ്ങളെക്കുറിച്ച് മുന്നറിയിപ്പ് നല്‍കിക്കൊണ്ട് സച്ച്ദേവ പറഞ്ഞു, 'വഞ്ചിക്കപ്പെടാന്‍ സാധ്യതയുള്ള ഒരുപാട് ആളുകളുണ്ട്... ആയുര്‍വേദത്തില്‍ ഒരു രോഗത്തിന് മരുന്നുണ്ടെന്ന് നിങ്ങള്‍ പറഞ്ഞാല്‍ ആളുകള്‍ അതിലേക്ക് ആകര്‍ഷിക്കപ്പെടും.'

അമിക്യുസ് ക്യൂറിയായി സേവനമനുഷ്ഠിച്ച സീനിയര്‍ അഡ്വക്കേറ്റ് ഷദന്‍ ഫറസത്, 2024 ഓഗസ്റ്റ് 27-ലെ സ്റ്റേ ഉത്തരവിന് ശേഷം 'ഒരുപാട് കാര്യങ്ങള്‍ സംഭവിച്ചിട്ടുണ്ട്' എന്ന് ബാര്‍ ആന്‍ഡ് ബെഞ്ച് റിപ്പോര്‍ട്ട് ചെയ്തു. 'സംസ്ഥാനങ്ങള്‍ നിയമം നടപ്പാക്കുന്നുണ്ടായിരുന്നു,' അദ്ദേഹം കൂട്ടിച്ചേര്‍ത്തു.

റൂള്‍ 170 ഇല്ലാതാക്കിയ വിജ്ഞാപനം, പരമ്പരാഗത മരുന്ന് അലോപ്പതി മരുന്ന് പോലെ കണക്കാക്കുന്നതിലേക്കുള്ള മാറ്റം സൂചിപ്പിക്കുന്നു.

നിരവധി തവണ മാപ്പ് പറഞ്ഞതിനെ തുടര്‍ന്ന് പതഞ്ജലി പ്രൊമോട്ടര്‍മാരായ ബാബാ രാംദേവിനും ആചാര്യ ബാലകൃഷ്ണയ്ക്കും എതിരെയുള്ള കോടതിയലക്ഷ്യ നടപടികള്‍ അവസാനിപ്പിക്കാനുള്ള കോടതിയുടെ തീരുമാനം, നിയമപരമായ തടസ്സങ്ങളില്ലാതെ കമ്പനിക്ക് തുടര്‍ന്ന് പ്രവര്‍ത്തിക്കാന്‍ വഴിയൊരുക്കിയിരിക്കുകയാണ്.