ബുൾഡോഗ്, പിറ്റ്ബുൾ,റോട്ട്‌വീലർ എന്നിവയുൾപ്പെടെ ആറ് ആക്രമണകാരികളായ നായകൾക്ക് നിരോധനം

ചണ്ഡീഗഡ്:അമേരിക്കൻ ബുൾഡോഗ്, അമേരിക്കൻ പിറ്റ്ബുൾ, ബുൾ ടെറിയർ എന്നിവയുൾപ്പെടെ ആറ് ആക്രമണകാരികളായ നായ ഇനങ്ങളെ നിരോധിച്ച് ചണ്ഡീഗഡ് മുനിസിപ്പൽ കോർപ്പറേഷൻ. 

ഇതുമായി ബന്ധപ്പെട്ട ദി മുനിസിപ്പൽ കോർപ്പറേഷൻ ചണ്ഡീഗഡ് പെറ്റ് ആൻഡ് കമ്മ്യൂണിറ്റി ഡോഗ്സ് ബൈ-ലോസ് 2025 ബുധനാഴ്ച കോർപ്പറേഷൻ പുറത്തിറക്കി. കെയ്ൻ കോർസോ, ഡോഗോ അർജന്റീനോ, റോട്ട്‌വീലർ എന്നിവയാണ് നിരോധനമുള്ള മറ്റ് ഇനങ്ങൾ.

പുതിയ നിയമം പൊതുജനങ്ങളുടെ സുരക്ഷയ്ക്കായി

ഈ ഇനങ്ങളിൽ ഏതെങ്കിലും നായ്ക്കളെ ഇതിനകം വളർത്തുന്നവർക്ക് നിരോധനം ബാധകമല്ലെന്ന് ഇതു സംബന്ധിച്ച് ചണ്ഡീഗഡ് മുനിസിപ്പൽ കോർപ്പറേഷൻ പുറത്തിറക്കിയ  വിജ്ഞാപനത്തിൽ പറയുന്നു.

പൊതുജനങ്ങളുടെ സുരക്ഷയ്ക്കായി, ആക്രമണകാരികളായ, അപകടകാരികളായ ചില ഇനം നായ്ക്കൾക്ക് ചണ്ഡീഗഡ് മുനിസിപ്പൽ കോർപ്പറേഷനൻ്റെ അധികാരപരിധിയിൽ വിലക്ക് ഏർപ്പെടുത്തിയിട്ടുണ്ടെന്ന് വിജ്ഞാപനത്തിൽ പറയുന്നു.

ഈ നിയമം  അറിയിച്ചതിനുശേഷം നിരോധിത നായ ഇനങ്ങളെ രജിസ്റ്റർ ചെയ്യില്ലെന്ന് അതിൽ പറയുന്നു.

നിയമം ലംഘിച്ചാൽ പിഴ 

"എന്നിരുന്നാലും, നിലവിലുള്ള ഉടമകൾക്ക് അവരുടെ നായ്ക്കളെ രജിസ്റ്റർ ചെയ്യുന്നതിന് 45 ദിവസത്തെ ബഫർ കാലയളവ് അനുവദിക്കും. ഈ കാലയളവിനുശേഷം,

ഈ നിരോധിത ഇനങ്ങളെ വളർത്തുകയോ സൂക്ഷിക്കുകയോ  ചെയ്യുന്നതായി കണ്ടെത്തുന്ന ഏതൊരു ഉടമയ്ക്കും, വളർത്തുമൃഗ ബ്രീഡറിനും, വളർത്തുമൃഗ കടയുടമയ്ക്കും,  പിഴ ചുമത്തപ്പെടും. ഇതിൽ അംഗീകൃത അധികാരികൾ നായകളെ ഉടനടി പിടിച്ചെടുക്കുന്നത് ഉൾപ്പെടുന്നു," അതിൽ പറയുന്നു.

പുറത്തിറക്കുമ്പോൾ മുൻ കരുതലുകൾ വേണം

വിജ്ഞാപനം കൃത്യമായി അറിയിക്കുന്നതിന് മുമ്പ് മുനിസിപ്പൽ കോർപ്പറേഷനിൽ ഈ നായ്ക്കളിലൊന്ന് രജിസ്റ്റർ ചെയ്തിട്ടുള്ള നായ ഉടമകൾക്ക് ഈ നിബന്ധന ബാധകമല്ല.

എന്നിരുന്നാലും, ഇത്തരം നായ്ക്കളെ പുറത്തിറക്കുമ്പോൾ അവയുടെ വായ് മൂടി കെട്ടിയിട്ടുണ്ടെന്നും ഏതെങ്കിലും അനിഷ്ട സംഭവങ്ങൾ ഒഴിവാക്കാൻ ശക്തമായ ഉപകരണങ്ങൾ ഉപയോഗിച്ച് അവയെ നിയന്ത്രണത്തിലാക്കാൻ ആവശ്യമായ മുൻ കരുതലുകൾ വേണം.

അനാവശ്യ സംഭവങ്ങൾ ഒഴിവാക്കാൻ  ചണ്ഡീഗഢ് മുനിസിപ്പൽ കോർപ്പറേഷനിൽ രജിസ്റ്റർ ചെയ്തിട്ടുള്ള നായ പരിശീലകർ മുഖേന അത്തരം നായ്ക്കളെ പരിശീലിപ്പിക്കാൻ നിർദ്ദേശിക്കുന്നതായും  വിജ്ഞാപനത്തിൽ പറയുന്നു.

പൊതു ഇടങ്ങളിൽ നിരോധനം

സുഖ്‌ന തടാകം, റോസ് ഗാർഡൻ, ശാന്തി കുഞ്ച്, റോക്ക് ഗാർഡൻ, ലീഷർ വാലി, ബൊഗൈൻവില്ല ഗാർഡൻ, ചണ്ഡീഗഢ് ബൊട്ടാണിക്കൽ ഗാർഡൻ സാരംഗ്പൂർ, മുനിസിപ്പൽ കോർപ്പറേഷൻ കമ്മീഷണർ ഇടയ്ക്കിടെ അറിയിച്ച മറ്റ് പൊതു സ്ഥലങ്ങൾ അല്ലെങ്കിൽ പൂന്തോട്ടങ്ങൾ എന്നിവിടങ്ങളിലേക്ക് നായ്ക്കളുടെ ഉടമ അവയെ കൊണ്ടുപോകരുത്.

ആരും തങ്ങളുടെ വളർത്തുനായ്ക്കളെ പൊതുസ്ഥലങ്ങളിൽ മലമൂത്ര വിസർജ്ജനം ചെയ്യാൻ അനുവദിക്കരുത്. 

നായ്ക്കൾ പൊതുസ്ഥലത്ത് മലമൂത്ര വിസർജ്ജനം നടത്തിയാൽ ഉടമ അതു  ശേഖരിച്ച് ഒരു മാലിന്യ സഞ്ചിയിൽ നിക്ഷേപിക്കുകയും ശരിയായ സംസ്കരണ രീതി/ഉപകരണങ്ങൾ ഉപയോഗിച്ച്  സംസ്കരിക്കുകയും വേണം. അല്ലാത്തപക്ഷം ഉടമയ്ക്ക് പിഴ ചുമത്തുമെന്നും അധികൃതർ അറിയിച്ചു.