പ്രധാനമന്ത്രി മോദി രണ്ട് ദിവസത്തെ ഗുജറാത്ത് സന്ദർശനം നടത്തും, ആറായിരം കോടി രൂപയുടെ പദ്ധതികളുടെ ഉദ്ഘാടനവും തറക്കല്ലിടലും നിർവഹിക്കും

അഹമ്മദാബാദ്: പ്രധാനമന്ത്രി നരേന്ദ്ര മോദി തിങ്കളാഴ്ച മുതല്‍ രണ്ട് ദിവസത്തെ ഗുജറാത്ത് സന്ദര്‍ശനം നടത്തും.

അഹമ്മദാബാദ്, ഗാന്ധിനഗര്‍, മെഹ്‌സാന എന്നിവിടങ്ങളില്‍ ഏകദേശം ആറായിരം കോടി രൂപയുടെ വികസന പദ്ധതികളുടെ ഉദ്ഘാടനവും തറക്കല്ലിടലും അദ്ദേഹം നിര്‍വഹിക്കും. അഹമ്മദാബാദില്‍ അദ്ദേഹം ഒരു റോഡ് ഷോയും നടത്തും. ഇതിനുശേഷം അദ്ദേഹം ഒരു പൊതുയോഗത്തെ അഭിസംബോധന ചെയ്യും.

അഹമ്മദാബാദില്‍ പ്രധാനമന്ത്രി മോദി 916 കോടി രൂപയുടെ പദ്ധതികള്‍ ഉദ്ഘാടനം ചെയ്യുമെന്നും 2209 കോടി രൂപയുടെ പദ്ധതികള്‍ക്ക് തറക്കല്ലിടുമെന്നും സംസ്ഥാന സര്‍ക്കാര്‍ വക്താവ് ഋഷികേശ് പട്ടേല്‍ പറഞ്ഞു. 

വടക്കന്‍ ഗുജറാത്ത് വൈദ്യുതി ബോര്‍ഡിന്റെ വൈദ്യുതി വിതരണ സംവിധാനം 608 കോടി രൂപ ചെലവില്‍ വികസിപ്പിക്കുമെന്നും പ്രധാനമന്ത്രി ആവാസ് യോജനയ്ക്ക് കീഴില്‍ ചേരികള്‍ വികസിപ്പിക്കുമെന്നും അദ്ദേഹം പറഞ്ഞു.

1624 കോടി രൂപ ചെലവില്‍ ആറ് വരി സര്‍ദാര്‍ പട്ടേല്‍ റിങ് റോഡ് പദ്ധതിയും ആരംഭിക്കും. ഗാന്ധിനഗറില്‍ 555 കോടി രൂപയുടെ പദ്ധതികള്‍ അദ്ദേഹം ഉദ്ഘാടനം ചെയ്യും.

പെതാപ്പൂരിലും രണ്‍ധേജയിലും വൈദ്യുതി വിതരണ പദ്ധതിയും ജലവിതരണ ലൈനുകളും അദ്ദേഹം ഉദ്ഘാടനം ചെയ്യും. ഇതോടൊപ്പം, സംസ്ഥാനതല ഡാറ്റാ സംഭരണ കേന്ദ്രത്തിന്റെയും മഴവെള്ള അടിസ്ഥാന സൗകര്യങ്ങളുടെയും തറക്കല്ലിടലും നടക്കും.