അദ്ദേഹം എൻ്റെ മുഖ്യമന്ത്രി കൂടിയാണ്, എനിക്ക് യോഗിയെ പോലൊരു മുഖ്യമന്ത്രിയുള്ളതിൽ അഭിമാനം: പുകഴ്ത്തി പ്രധാമന്ത്രി

ഡൽഹി: ഉത്തർപ്രദേശ് മുഖ്യമന്ത്രി യോഗി ആദിത്യനാഥിനെ പ്രശംസിച്ച് പ്രധാനമന്ത്രി നരേന്ദ്ര മോദി. യോഗിയെ പോലൊരു മുഖ്യമന്ത്രിയെ തനിക്ക് ലഭിച്ചതിൽ താൻ അഭിമാനിക്കുന്നുവെന്ന് മോദി പറഞ്ഞു. അലിഗഡിൽ ഒരു തിരഞ്ഞെടുപ്പ് റാലിയെ അഭിസംബോധന ചെയ്ത് സംസാരിക്കുകയായിരുന്നു പ്രധാനമന്ത്രി.

'ബിജെപി കാരണമാണ് ഉത്തർപ്രദേശ് 'ആത്മനിർഭർ ഭാരത്-ആത്മനിർഭർ സേന'യുടെ കേന്ദ്രമായി മാറുന്നത്. ബുൾഡോസറിലൂടെ യോഗിയെ തിരിച്ചറിയുന്നവരോട് എനിക്ക് പറയാനുള്ളത്, യോഗി സർക്കാർ ചെയ്തിട്ടുള്ള വ്യാവസായിക പ്രവർത്തനങ്ങൾ സ്വാതന്ത്ര്യത്തിന് ശേഷം ആരും ചെയ്തിട്ടില്ല എന്നാണ്. അദ്ദേഹത്തെപ്പോലെ ഒരു മുഖ്യമന്ത്രി എനിക്കുണ്ടായതിൽ ഞാൻ അഭിമാനിക്കുന്നു' പ്രധാനമന്ത്രി പറഞ്ഞു.

'ഒരു ജില്ല, ഒരു ഉൽപ്പന്നം എന്ന അദ്ദേഹത്തിൻ്റെ ദൗത്യം രാജ്യത്തുടനീളം പുതിയ ആദരവ് സൃഷ്ടിക്കുന്നു. കാശിയിൽ നിന്നുള്ള എംപി എന്ന നിലയിൽ അദ്ദേഹം എൻ്റെ മുഖ്യമന്ത്രി കൂടിയാണ്. എനിക്ക് അത്തരം സഹപ്രവർത്തകർ ഉള്ളതിൽ അഭിമാനിക്കുന്നു," അദ്ദേഹം കൂട്ടിച്ചേർത്തു. യോഗി ആദിത്യനാഥും മറ്റ് ബിജെപി നേതാക്കളും ചടങ്ങിൽ പങ്കെടുത്തിരുന്നു.

"ഇന്ത്യയെ അഴിമതിയിൽ നിന്നും വംശീയ രാഷ്ട്രീയത്തിൽ നിന്നും മുക്തമാക്കേണ്ട സമയം അതിക്രമിച്ചിരിക്കുന്നു, ഇതിനായി ഞങ്ങൾക്ക് വോട്ട് ചെയ്യേണ്ടത് പ്രധാനമാണ്. അലിഗഢിൽ ഏപ്രിൽ 26 നും ഹത്രാസിൽ മെയ് 7 നും ആണ് പോളിംഗ്. നിങ്ങൾ എല്ലാവരും ബിജെപി സ്ഥാനാർത്ഥികൾക്ക് വോട്ട് ചെയ്യണം. പ്രധാനമന്ത്രി മോദി പറഞ്ഞു.

"ഞാൻ കഴിഞ്ഞ തവണ അലിഗഢിൽ വന്നപ്പോൾ, സ്വജനപക്ഷപാതം, അഴിമതി, സമാജ്‌വാദി പാർട്ടിയുടെയും കോൺഗ്രസിൻ്റെയും പ്രീണനം എന്നിവയുടെ ഫാക്ടറിക്ക് പൂട്ട് ഇടാൻ ഞാൻ നിങ്ങളോട് അഭ്യർത്ഥിച്ചു. നിങ്ങൾ അത് വളരെ ഭംഗിയായി ചെയ്തു, നിങ്ങളുടെ അനുഗ്രഹം തേടാനാണ് ഞാൻ ഇന്ന് ഇവിടെ വന്നത്," പ്രധാനമന്ത്രി മോദി പറഞ്ഞു.