ഹരിദ്വാറില്‍ തുടര്‍ച്ചയായി വൈദ്യുതി മുടങ്ങുന്നതില്‍ വ്യത്യസ്ത പ്രതിഷേധവുമായി കോണ്‍ഗ്രസ് എംഎല്‍എ. ഉദ്യോഗസ്ഥരുടെ വീടുകളിലെ വൈദ്യുതി വിച്ഛേദിച്ചു

ഹരിദ്വാര്‍: രാജ്യത്തിന്റെ ഗ്രാമപ്രദേശങ്ങളില്‍ ആളുകള്‍ നിരന്തരം നേരിടുന്ന ഒരു പ്രശ്‌നമാണ് ഇടയ്ക്കിടെയുള്ള വൈദ്യുതി മുടക്കം. ഈ ആശങ്ക പരിഹരിക്കാന്‍ നിരവധി നടപടികള്‍ സ്വീകരിച്ചിട്ടുണ്ടെങ്കിലും ചില ഭാഗങ്ങളില്‍ ഇടയ്ക്കിടെ വൈദ്യുതി തടസ്സങ്ങള്‍ നേരിടുന്നുണ്ട്. 

പൊതുവെ, പ്രതിഷേധങ്ങള്‍ നടത്തി ആളുകള്‍ ഇതില്‍ അതൃപ്തി പ്രകടിപ്പിക്കാറുണ്ട്. എന്നാല്‍ ഉത്തരാഖണ്ഡിലെ ഹരിദ്വാര്‍ ജില്ലയില്‍, ഒരു കോണ്‍ഗ്രസ് എംഎല്‍എ തന്റെ രോഷം പ്രകടിപ്പിച്ചത് ഉദ്യോഗസ്ഥരുടെ വീടുകളിലെ വൈദ്യുതി വിച്ഛേദിക്കാന്‍ തീരുമാനിച്ചു കൊണ്ടായിരുന്നു.

ഹരിദ്വാര്‍ ജില്ലയിലെ ജാബ്രേഡയില്‍ നിന്നുള്ള നിയമസഭാംഗമായ വീരേന്ദ്ര ജതിയാണ്  ഉദ്യോഗസ്ഥരുടെ വീടുകളിലെ വൈദ്യുതി വിച്ഛേദിച്ചത്.

വീരേന്ദ്ര ജതി ഒരു തൂണില്‍ കയറി വകുപ്പിലെ മൂന്ന് ഉദ്യോഗസ്ഥരുടെ വീടുകളിലേക്കുള്ള വൈദ്യുതി വിച്ഛേദിക്കുന്നതായി കാണിക്കുന്ന ഒരു വീഡിയോ സോഷ്യല്‍ മീഡിയയില്‍ വൈറലായിട്ടുണ്ട്. 

ബോട്ട് ക്ലബ്ബിലെ സൂപ്രണ്ടിംഗ് എഞ്ചിനീയർ വിവേക് ​​രജ്പുത്തിന്റെ ഔദ്യോഗിക വസതിക്ക് പുറത്തുള്ള വൈദ്യുതി തൂണിൽ ജതിയും അനുയായികളും ഗോവണി ഉപയോഗിച്ച് കയറി വീട്ടിലേക്കുള്ള വൈദ്യുതി ബന്ധം വിച്ഛേദിക്കുന്നത് വീഡിയോയിൽ കാണാം.

പിന്നീട്, അദ്ദേഹം ചീഫ് എഞ്ചിനീയർ അനുപം സിങ്ങിന്റെയും എക്സിക്യൂട്ടീവ് എഞ്ചിനീയർ വിനോദ് പാണ്ഡെയുടെയും ഔദ്യോഗിക വസതികളിൽ പോയി അവരുടെ വീടുകളിലേക്കുള്ള വൈദ്യുതി വിച്ഛേദിച്ചു.