പൂനെ അപകടം: കൗമാരക്കാരന്റെ രക്തസാമ്പിള്‍ മാറ്റിയ ഡോക്ടര്‍ അജയ് തവാഡെയെ സൂപ്രണ്ടായി നിയമിച്ചു: മന്ത്രിക്കും എംഎല്‍എയ്ക്കുമെതിരെ വെളിപ്പെടുത്തലുമായി ആശുപത്രി ഡീന്‍

പൂനെ: പൂനെയില്‍ പോര്‍ഷെ കാര്‍ അപകടത്തില്‍പ്പെട്ട സംഭവത്തില്‍ പ്രതിയായ 17 വയസുകാരന്റെ രക്തസാമ്പിള്‍ മാറ്റിയെന്ന ആരോപണത്തിന് വിധേയനായ ഡോക്ടര്‍ അജയ് തവാഡെയെ സംസ്ഥാന മെഡിക്കല്‍ വിദ്യാഭ്യാസ മന്ത്രിയുടെ അനുമതിക്ക് ശേഷം സൂപ്രണ്ടായി നിയമിച്ചതായി ആശുപത്രി ഡീനിന്റെ അവകാശവാദം.

വൃക്ക മാറ്റിവയ്ക്കല്‍, മയക്കുമരുന്ന് കേസുകളില്‍ പ്രതിയായ ഡോ. തവാരെയെ ഫോറന്‍സിക് മെഡിക്കല്‍ വിഭാഗം മേധാവിയായാണ് നിയമിച്ചതെന്ന് സാസൂണ്‍ ജനറല്‍ ആശുപത്രി ഡീന്‍ വിനായക് കാലെ പറഞ്ഞു.

ഡോ. തവാഡെയുടെ നിയമനത്തിനായി നിയമസഭാംഗമായ സുനില്‍ ടിങ്കെ മെഡിക്കല്‍ വിദ്യാഭ്യാസ മന്ത്രി ഹസന്‍ മുഷ്രിഫിനോട് ശുപാര്‍ശ ചെയ്തതായി കാലെ അവകാശപ്പെട്ടു. എന്‍സിപി അജിത് പവാര്‍ വിഭാഗത്തില്‍പ്പെട്ടവരാണ് ടിങ്കെയും മുഷ്രിഫും.