തീവ്രവാദത്തിനെതിരായ ഇന്ത്യയുടെ പോരാട്ടത്തിന് റഷ്യയുടെ പൂർണ്ണ പിന്തുണ; പ്രധാനമന്ത്രി മോദിയെ പ്രശംസിച്ച് പുടിൻ

ഡല്‍ഹി: തീവ്രവാദത്തിനെതിരായ ഇന്ത്യയുടെ പോരാട്ടത്തിന് മോസ്‌കോ പൂര്‍ണ്ണമായി പിന്തുണ നല്‍കുമെന്ന് റഷ്യന്‍ പ്രസിഡന്റ് വ്ളാഡിമിര്‍ പുടിന്‍. അക്രമപരമായ തീവ്രവാദത്തെ നേരിടുന്നതില്‍ ഇന്ത്യ തങ്ങളുടെ ഒരു പൂര്‍ണ്ണ സഖ്യകക്ഷിയാണെന്നും അദ്ദേഹം വിശേഷിപ്പിച്ചു.

പഹല്‍ഗാമിലെയും ഡല്‍ഹിയിലെയും ഭീകരാക്രമണങ്ങളെക്കുറിച്ചും ഒരേ ഗ്രൂപ്പിനെ ഒരു രാജ്യത്ത് ഭീകരരായും മറ്റൊരു രാജ്യത്ത് സ്വാതന്ത്ര്യ പോരാളികളായും ലേബല്‍ ചെയ്യുന്ന ആഗോള പ്രവണതയെക്കുറിച്ചുമുള്ള ചോദ്യത്തിന് മറുപടി പറയവെയാണ് പുടിന്‍ ഈ അഭിപ്രായങ്ങള്‍ പ്രകടിപ്പിച്ചത്.

ഭീകരതയോടുള്ള ഈ ഇരട്ട സമീപനത്തെ രാജ്യങ്ങള്‍ എങ്ങനെ നേരിടണം എന്ന ചോദ്യത്തിന് പുടിന്‍ വ്യക്തമായ മറുപടി നല്‍കി. 'അത് വളരെ ലളിതമാണ്.

സ്വാതന്ത്ര്യം നേടുന്നതിന് നമ്മള്‍ നിയമപരമായ മാര്‍ഗ്ഗങ്ങള്‍ മാത്രമേ ഉപയോഗിക്കാവൂ. ക്രിമിനല്‍ രീതികളോ ആളുകള്‍ക്ക് ദോഷം വരുത്തുന്നതോ ആയ ഒരു നടപടിയെയും പിന്തുണയ്ക്കാന്‍ കഴിയില്ല,' അദ്ദേഹം പറഞ്ഞു.