തീരുവയെച്ചൊല്ലിയുള്ള ഇന്ത്യ-യുഎസ് സംഘർഷം; റഷ്യൻ എണ്ണയല്ല കാരണമെന്ന് രഘുറാം രാജൻ

സൂറിച്ച്:  ഇന്ത്യയുടെ കയറ്റുമതിയില്‍ അമേരിക്ക 50% തീരുവ ചുമത്തിയത് റഷ്യയില്‍ നിന്നുള്ള എണ്ണ വാങ്ങലുകളുടെ ഫലമല്ലെന്നും, മെയ് മാസത്തില്‍ ഇന്ത്യയും പാകിസ്ഥാനും തമ്മിലുള്ള നാല് ദിവസത്തെ സൈനിക സംഘര്‍ഷത്തില്‍ ഡൊണാള്‍ഡ് ട്രംപിന്റെ രോഷം മൂലമാണെന്നും മുന്‍ റിസര്‍വ് ബാങ്ക് ഗവര്‍ണറും സാമ്പത്തിക ശാസ്ത്രജ്ഞനുമായ രഘുറാം രാജന്‍. 

പാകിസ്ഥാന്‍ ഇവിടെ മികച്ച കളിയാണ് കാഴ്ചവെച്ചതെന്നും അദ്ദേഹം പറഞ്ഞു. അന്ന് ട്രംപ് വെടിനിര്‍ത്തലിന്റെ അവകാശവാദം ഏറ്റെടുത്തിരുന്നുവെന്ന് രഘുറാം രാജന്‍ പറഞ്ഞു, എന്നാല്‍ പാകിസ്ഥാന്‍ രണ്ടുതവണ ചര്‍ച്ചകള്‍ അഭ്യര്‍ത്ഥിച്ചതിന് ശേഷമാണ് വെടിനിര്‍ത്തല്‍ ഉണ്ടായതെന്ന് ഇന്ത്യ വ്യക്തമാക്കി. 

ഇന്ത്യ-പാകിസ്ഥാന്‍ ചര്‍ച്ചകളിലൂടെ മാത്രമേ വെടിനിര്‍ത്തല്‍ സാധ്യമാകൂ എന്ന് ഇന്ത്യന്‍ സൈനിക നേതൃത്വം പ്രസ്താവിച്ചപ്പോള്‍, പാകിസ്ഥാന്‍ ട്രംപിനോട് പരസ്യമായി നന്ദി പറഞ്ഞു.

റഷ്യയില്‍ നിന്നുള്ള എണ്ണ ഇറക്കുമതിയെക്കുറിച്ചുള്ള ഇന്ത്യയുടെ നിലപാടല്ല. ട്രംപിന്റെ വ്യക്തിപരമായ പ്രതികരണമാണ് സംഘര്‍ഷത്തിന് കാരണമെന്ന് രഘുറാം രാജന്‍ പറഞ്ഞു.