നിങ്ങള്‍ എത്ര വിജയിച്ചാലും ബുദ്ധിമാനും, കഴിവുള്ളവനായാലും നിങ്ങള്‍ ഒരു ദളിതനാണെങ്കില്‍ നിങ്ങളെ തകര്‍ക്കാനും ചവിട്ടിമെതിക്കാനും വലിച്ചെറിയാനും കഴിയും. ഐപിഎസ് ഓഫീസര്‍ വൈ പുരണ്‍ കുമാറിന്റെ ആത്മഹത്യ കോടിക്കണക്കിന് ദലിതര്‍ക്ക് ഒരു സന്ദേശം നല്‍കിയിട്ടുണ്ടെന്ന് രാഹുല്‍ ഗാന്ധി

ചണ്ഡീഗഢ്: ഹരിയാനയിലെ ഐപിഎസ് ഓഫീസര്‍ വൈ പുരണ്‍ കുമാറിന്റെ ആത്മഹത്യ കോടിക്കണക്കിന് ദലിതര്‍ക്ക് ഒരു സന്ദേശം നല്‍കിയിട്ടുണ്ടെന്ന് ലോക്സഭയിലെ പ്രതിപക്ഷ നേതാവ് രാഹുല്‍ ഗാന്ധി. നിങ്ങള്‍ എത്ര വിജയിച്ചാലും നിങ്ങളെ തകര്‍ക്കാനും വലിച്ചെറിയാനും കഴിയുമെന്ന് അദ്ദേഹം പറഞ്ഞു.

രാഹുല്‍ ഗാന്ധി ചണ്ഡീഗഡിലെ വീട്ടിലെത്തി മുതിര്‍ന്ന ഐപിഎസ് ഉദ്യോഗസ്ഥന്റെ കുടുംബത്തെ കണ്ടു. മുതിര്‍ന്ന കോണ്‍ഗ്രസ് നേതാക്കളായ ദീപേന്ദര്‍ സിംഗ് ഹൂഡ, കുമാരി സെല്‍ജ എന്നിവരും അദ്ദേഹത്തോടൊപ്പം ഉണ്ടായിരുന്നു.

മുതിര്‍ന്ന പോലീസുകാരന്റെ കുടുംബത്തെ സന്ദര്‍ശിച്ച ശേഷം മാധ്യമങ്ങളോട് സംസാരിച്ച ഗാന്ധി, മറ്റ് ഉദ്യോഗസ്ഥര്‍ അദ്ദേഹത്തിന്റെ മനോവീര്യം തകര്‍ക്കാനും കരിയറിനും പ്രശസ്തിക്കും കേടുപാടുകള്‍ വരുത്താനും ശ്രമിച്ചതിനാല്‍ വര്‍ഷങ്ങളായി ആസൂത്രിതമായ വിവേചനം നേരിടേണ്ടി വന്നിട്ടുണ്ടെന്ന് പറഞ്ഞു.

'ഇത് ഒരു കുടുംബത്തിന്റെ മാത്രം കാര്യമല്ല. രാജ്യത്ത് കോടിക്കണക്കിന് ദളിത് സഹോദരീ സഹോദരന്മാരുണ്ട്.

നിങ്ങള്‍ എത്ര വിജയിച്ചാലും, ബുദ്ധിമാനും, കഴിവുള്ളവനായാലും, നിങ്ങള്‍ ഒരു ദളിതനാണെങ്കില്‍, നിങ്ങളെ തകര്‍ക്കാനും, ചവിട്ടിമെതിക്കാനും, വലിച്ചെറിയാനും കഴിയുമെന്ന തെറ്റായ സന്ദേശം അവര്‍ക്ക് ലഭിക്കുന്നു. ഇത് ഞങ്ങള്‍ക്ക് സ്വീകാര്യമല്ല,' അദ്ദേഹം പറഞ്ഞു.

വൈ പുരണ്‍ കുമാറിന്റെ വീട്ടില്‍ നിന്ന് കണ്ടെത്തിയ ആത്മഹത്യാക്കുറിപ്പില്‍ പേരുള്ള ഉദ്യോഗസ്ഥര്‍ക്കെതിരെ നടപടിയെടുക്കണമെന്ന് അദ്ദേഹം പ്രധാനമന്ത്രി നരേന്ദ്ര മോദിയോടും ഹരിയാന മുഖ്യമന്ത്രി നയാബ് സിംഗ് സൈനിയോടും അഭ്യര്‍ത്ഥിച്ചു.