റായ്ബറേലിയിൽ കൊല്ലപ്പെട്ട ദളിത് യുവാവിന്റെ കുടുംബത്തെ രാഹുൽ ഗാന്ധി സന്ദർശിച്ചു

കാണ്‍പൂര്‍: റായ്ബറേലിയില്‍ ആള്‍ക്കൂട്ട ആക്രമണത്തില്‍ കൊല്ലപ്പെട്ട ദളിത് യുവാവ് ഹരിഓം വാല്‍മീകിയുടെ കുടുംബവുമായി കോണ്‍ഗ്രസ് നേതാവ് രാഹുല്‍ ഗാന്ധി വെള്ളിയാഴ്ച കൂടിക്കാഴ്ച നടത്തി.

രാഹുല്‍ ഗാന്ധി കുടുംബാംഗങ്ങളുമായി സംവദിച്ചതായി ഇരയുടെ അമ്മാവന്‍ ചൗധരി ഭക്ത് ദാസ് പറഞ്ഞു.

ഒക്ടോബര്‍ 2 ന് പുലര്‍ച്ചെ ഒരു മണിയോടെ രാത്രിയില്‍ ഗ്രാമവാസികള്‍ വാല്‍മീകിയെ (40) കള്ളനാണെന്ന് തെറ്റിദ്ധരിച്ച് തല്ലിക്കൊല്ലുകയായിരുന്നു.

ഈ സംഭവം വ്യാപകമായ പ്രതിഷേധത്തിന് കാരണമായിരുന്നു. ദളിതരെ സംരക്ഷിക്കുന്നതിലും ആള്‍ക്കൂട്ട ആക്രമണം തടയുന്നതിലും ബിജെപി സര്‍ക്കാര്‍ പരാജയപ്പെട്ടുവെന്ന് കോണ്‍ഗ്രസും സമാജ്വാദി പാര്‍ട്ടിയും ഉള്‍പ്പെടെയുള്ള പ്രതിപക്ഷ പാര്‍ട്ടികള്‍ ആരോപിച്ചു.

ആക്രമണത്തെത്തുടര്‍ന്ന് പോലീസ് കേസ് രജിസ്റ്റര്‍ ചെയ്യുകയും ഒക്ടോബര്‍ 10 ന് നടന്ന ഏറ്റുമുട്ടലിന് ശേഷം അറസ്റ്റിലായ പ്രധാന പ്രതി ഉള്‍പ്പെടെ 14 പേരെ ഇതുവരെ അറസ്റ്റ് ചെയ്യുകയും ചെയ്തു.

കേസ് കൈകാര്യം ചെയ്യുന്നതില്‍ വീഴ്ച വരുത്തിയെന്ന് ആരോപിച്ച് രണ്ട് സബ് ഇന്‍സ്‌പെക്ടര്‍മാര്‍ ഉള്‍പ്പെടെ അഞ്ച് പോലീസുകാരെ സസ്‌പെന്‍ഡ് ചെയ്തു.