'മഹാത്മാഗാന്ധിയുടെ ആദർശങ്ങൾക്ക് നേരിട്ടുള്ള അപമാനം'. എംജിഎൻആർഇജിഎയുടെ പേരുമാറ്റത്തിൽ കേന്ദ്രത്തെ വിമർശിച്ച് രാഹുൽ ഗാന്ധി

ഡല്‍ഹി: എംജിഎന്‍ആര്‍ഇജിഎയുടെ പേര് മാറ്റിയതില്‍ കോണ്‍ഗ്രസ് നേതാവ് രാഹുല്‍ ഗാന്ധി കേന്ദ്രത്തിനെതിരെ രൂക്ഷമായി വിമര്‍ശിച്ചു.

ഗ്രാമീണ തൊഴില്‍ സംബന്ധിച്ച പുതിയ ബില്‍ മഹാത്മാഗാന്ധിയുടെ ആദര്‍ശങ്ങളെ അപമാനിക്കുന്നതാണെന്ന് അദ്ദേഹം വിശേഷിപ്പിച്ചു. കടുത്ത തൊഴിലില്ലായ്മയിലൂടെ ഇന്ത്യയിലെ യുവാക്കളുടെ ഭാവി നശിപ്പിച്ച ശേഷം ഗ്രാമീണ ദരിദ്രരുടെ ഉപജീവനമാര്‍ഗ്ഗം ഇല്ലാതാക്കാന്‍ നരേന്ദ്ര മോദി സര്‍ക്കാര്‍ ശ്രമിക്കുന്നുവെന്ന് അദ്ദേഹം ആരോപിച്ചു.

എംജിഎന്‍ആര്‍ഇജിഎയ്ക്ക് പകരമായി കൊണ്ടുവരാന്‍ ശ്രമിക്കുന്ന വിബി-ജി റാം ജി ബില്ലിനെതിരെ രാഹുല്‍ ഗാന്ധിയെ കൂടാതെ നിരവധി പ്രതിപക്ഷ എംപിമാര്‍ ചൊവ്വാഴ്ച പാര്‍ലമെന്റ് ഹൗസ് സമുച്ചയത്തില്‍ പ്രതിഷേധിച്ചു. ബിജെപി നേതൃത്വത്തിലുള്ള എന്‍ഡിഎ സര്‍ക്കാര്‍ മഹാത്മാഗാന്ധിയെ 'അപമാനിച്ചു' എന്ന് അവര്‍ ആരോപിച്ചു.

മഹാത്മാഗാന്ധിയുടെ ആശയങ്ങളെ പ്രധാനമന്ത്രി മോദി എപ്പോഴും എതിര്‍ത്തിരുന്നുവെന്നും അധികാരത്തില്‍ വന്നതുമുതല്‍ മഹാത്മാഗാന്ധി ദേശീയ ഗ്രാമീണ തൊഴിലുറപ്പ് നിയമത്തെ ദുര്‍ബലപ്പെടുത്താന്‍ ശ്രമിച്ചുകൊണ്ടിരിക്കുകയാണെന്നും രാഹുല്‍ ഗാന്ധി ആരോപിച്ചു. അത്തരം ഏതൊരു നീക്കത്തെയും കോണ്‍ഗ്രസ് എതിര്‍ക്കുമെന്ന് അദ്ദേഹം ഉറപ്പിച്ചു പറഞ്ഞു.