'ഔദ്യോഗികമായി പരാതി നൽകാത്തത് എന്തുകൊണ്ട്'? രാഹുൽ ഗാന്ധിക്കെതിരെ തെരഞ്ഞെടുപ്പ് കമ്മീഷൻ്റെ രൂക്ഷ വിമർശനം

ഡല്‍ഹി: 2024 ലെ മഹാരാഷ്ട്ര നിയമസഭാ തെരഞ്ഞെടുപ്പില്‍ ഒത്തുകളി നടത്തിയെന്ന ആരോപണത്തില്‍ കോണ്‍ഗ്രസ് നേതാവ് രാഹുല്‍ ഗാന്ധിയും ഇന്ത്യന്‍ തിരഞ്ഞെടുപ്പ് കമ്മീഷനും തമ്മിലുള്ള തര്‍ക്കം തുടരുകയാണ്. 

ഈ കാര്യത്തില്‍ കമ്മീഷന് ഔദ്യോഗികമായി പരാതി നല്‍കാത്തതിന് തിരഞ്ഞെടുപ്പ് കമ്മീഷന്‍ രാഹുല്‍ ഗാന്ധിയെ വിമര്‍ശിച്ചു.

രാഹുല്‍ ഗാന്ധിയുടെ പരസ്യ പ്രസ്താവനകളില്‍ ക്രമക്കേടുകള്‍ ആരോപിക്കുകയോ ആശങ്കകള്‍ ഉന്നയിക്കുകയോ ചെയ്തിട്ടും, പരാമര്‍ശങ്ങള്‍ക്ക് രണ്ട് ദിവസത്തിന് ശേഷവും അദ്ദേഹം ഔദ്യോഗികമായി പരാതി നല്‍കുകയോ കൂടിക്കാഴ്ചയ്ക്ക് അപേക്ഷിക്കുകയോ ചെയ്തിട്ടില്ലെന്ന് ഇസിഐ പറയുന്നു. 

'വിഷയം വളരെ ഗൗരവമുള്ളതാണെങ്കില്‍ എന്തുകൊണ്ടാണ് രാഹുല്‍ ഗാന്ധി ഇസിഐയെ കാണാന്‍ സമയം ചോദിക്കാത്തത്?' കമ്മീഷന്‍  ചോദിച്ചു.

2024 ഡിസംബര്‍ 24-ന് ഇന്ത്യന്‍ നാഷണല്‍ കോണ്‍ഗ്രസിന് ഒരു കത്ത് അയച്ചതായും കമ്മീഷന്‍ വ്യക്തമാക്കി. കമ്മീഷന്റെ വെബ്സൈറ്റില്‍ ഇപ്പോഴും പൊതുജനങ്ങള്‍ക്ക് ലഭ്യമാകുന്ന ഒരു രേഖയാണിത്.