ഒരു മണ്ഡലത്തിൽ ഒരു ലക്ഷം കള്ളവോട്ട്. കർണാടക വോട്ടർ പട്ടികയിലെ വ്യാപക കൃത്രിമം ചൂണ്ടിക്കാട്ടി രാഹുൽ ഗാന്ധി

ഡല്‍ഹി: ലോക്സഭാ തിരഞ്ഞെടുപ്പില്‍ വ്യാപക കൃത്രിമം നടന്നതായി രാഹുല്‍ ഗാന്ധി. പിന്നാലെ തെരഞ്ഞെടുപ്പ് കമ്മീഷന്‍ ബിജെപിയുമായി ഒത്തുകളിച്ചുവെന്നാണ് കോണ്‍ഗ്രസ് എംപിയുടെ ആരോപണം. കര്‍ണാടക വോട്ടര്‍ പട്ടിക കാണിച്ച് വ്യാജ വോട്ടര്‍മാരെ ചേര്‍ക്കാന്‍ ശ്രമിച്ചുവെന്ന് രാഹുല്‍ ഗാന്ധി ആരോപിച്ചു.

ബാംഗ്ലൂര്‍ സെന്‍ട്രല്‍ ലോക്സഭാ സീറ്റിലെ മഹാദേവപുര നിയമസഭാ മണ്ഡലത്തില്‍ വന്‍തോതിലുള്ള വോട്ട് മോഷണം നടന്നതായി രാഹുല്‍ ഗാന്ധി അവകാശപ്പെട്ടു.

മഹാദേവപുര നിയമസഭാ മണ്ഡലത്തിലെ 6.5 ലക്ഷം വോട്ടുകളില്‍ ഒരു ലക്ഷത്തിലധികം വോട്ടുകളുടെ 'മോഷണം' ഉണ്ടെന്ന് രാഹുല്‍ഗാന്ധി അവകാശപ്പെട്ടു.

കര്‍ണാടകയിലെ മഹാദേവപുര മണ്ഡലത്തില്‍ ഒരു ലക്ഷത്തിലധികം ഡ്യൂപ്ലിക്കേറ്റ് വോട്ടര്‍മാര്‍, അസാധുവായ വിലാസങ്ങള്‍ എന്നിവ കോണ്‍ഗ്രസ് നടത്തിയ ആഭ്യന്തര ഗവേഷണത്തില്‍ കണ്ടെത്തിയതായി അദ്ദേഹം പറഞ്ഞു.

2024 ലെ ലോക്സഭാ തെരഞ്ഞെടുപ്പില്‍ ബാംഗ്ലൂര്‍ സെന്‍ട്രലില്‍ ഇഞ്ചോടിഞ്ച് പോരാട്ടമാണ് നടന്നത്. വോട്ടെണ്ണലിന്റെ ഭൂരിഭാഗവും കോണ്‍ഗ്രസ് സ്ഥാനാര്‍ത്ഥി മന്‍സൂര്‍ അലി ഖാന്‍ ലീഡ് നിലനിര്‍ത്തിയപ്പോള്‍, അന്തിമ ഫലങ്ങള്‍ പ്രകാരം ബിജെപിയുടെ പിസി മോഹന്‍ 32,707 വോട്ടുകളുടെ നേരിയ വിജയമാണ് നേടിയത്.

ഇലക്ഷന്‍ കമ്മീഷന്‍ വോട്ടര്‍ പട്ടിക ഇലക്ട്രോണിക് ഫോര്‍മാറ്റില്‍ നല്‍കാത്തതില്‍ റായ്ബറേലി എംപി സംശയം പ്രകടിപ്പിച്ചു, അങ്ങനെ ചെയ്യുന്നത് 30 സെക്കന്‍ഡിനുള്ളില്‍ അവരുടെ 'വഞ്ചന' വെളിപ്പെടുത്തുമെന്ന് അഭിപ്രായപ്പെട്ടു.