കർണാടകയിൽ നാശം വിതച്ച് കനത്ത മഴ, മണ്ണിടിച്ചിലിൽ 6 പേർ മരിച്ചു; 125 വർഷം പഴക്കമുള്ള റെക്കോർഡ് തകർത്തതായി മുഖ്യമന്ത്രി

മംഗളൂരു: കര്‍ണാടകയില്‍ കനത്ത മഴയിലും മണ്ണിടിച്ചിലിലും ആറ് പേര്‍ മരിച്ചു. വ്യാഴാഴ്ച രാത്രി മോണ്ടെപദവ് കോടി പ്രദേശത്ത് ഉണ്ടായ മണ്ണിടിച്ചിലില്‍ ഒരു വീടിന്റെ അവശിഷ്ടങ്ങള്‍ക്കിടയില്‍ അഞ്ച് പേര്‍ കുടുങ്ങിയതായി അധികൃതര്‍ അറിയിച്ചു.

അവശിഷ്ടങ്ങള്‍ക്കിടയില്‍ നിന്ന് സ്ത്രീയെയും കുട്ടിയെയും രക്ഷപ്പെടുത്തി ഗുരുതരാവസ്ഥയില്‍ ആശുപത്രിയില്‍ പ്രവേശിപ്പിച്ചു. സ്ത്രീയുടെ മറ്റൊരു കുട്ടി മരിച്ചു.

വ്യാഴാഴ്ച രാത്രി മുഴുവന്‍ പെയ്ത പേമാരിയെ തുടര്‍ന്നുണ്ടായ മറ്റൊരു മണ്ണിടിച്ചിലില്‍ മൂന്ന് പേര്‍ മരിച്ചു. ദേശീയ ദുരന്ത നിവാരണ സേന, സംസ്ഥാന ദുരന്ത നിവാരണ സേന, തദ്ദേശ പോലീസ് എന്നിവരുമായി സഹകരിച്ചാണ് രക്ഷാപ്രവര്‍ത്തനങ്ങള്‍ നടത്തുന്നത്. കഴിഞ്ഞ 125 വര്‍ഷത്തെ റെക്കോര്‍ഡ് മഴ തകര്‍ത്തതായി കര്‍ണാടക മുഖ്യമന്ത്രി പറഞ്ഞു. 

മറ്റൊരു സംഭവത്തില്‍, വെള്ളിയാഴ്ച രാവിലെ മംഗളൂരുവില്‍ വീടിന്റെ മതില്‍ ഇടിഞ്ഞുവീണ് ആറ് വയസ്സുകാരി മരിച്ചു.

വ്യാഴാഴ്ച ഹൈടെന്‍ഷന്‍ ലൈന്‍ നന്നാക്കുന്നതിനിടെ ഒരു ലൈന്‍മാന്‍ വൈദ്യുതാഘാതമേറ്റ് മരിച്ചു. മുഖ്യമന്ത്രി സിദ്ധരാമയ്യ സ്ഥിതിഗതികള്‍ അവലോകനം ചെയ്യുകയും ആവശ്യമായ നടപടികള്‍ക്ക് നിര്‍ദ്ദേശങ്ങള്‍ നല്‍കുകയും ചെയ്തു.