മുംബൈയിലും കനത്ത മഴ: മിക്ക തെരുവുകളും വെള്ളത്തിനടിയിൽ. ട്രെയ്ൻ - റോഡ് ഗതാഗതം താറുമാറായി. നദികളിൽ ജലനിരപ്പ് ഉയർന്നതോടെ മേഖലയിൽ വെള്ളപ്പൊക്ക ഭീഷണി

മുംബൈ: മഴ കനത്തതോടെ മുംബൈ നഗരവും പ്രാന്തപ്രദേശങ്ങളും വെള്ളത്തിനടിയിൽ. മുംബൈയിലും സമീപ പ്രദേശങ്ങളിലും മണിക്കൂറിൽ 60 കിലോമീറ്റർ വേഗതയുള്ള കാറ്റും മേഖലയിൽ ഭീഷണിയാണ്. 

മാഹിം, താനെ, പടിഞ്ഞാറൻ പ്രാന്തപ്രദേശങ്ങളുടെ ചില ഭാഗങ്ങൾ എന്നിവയുൾപ്പെടെ നിരവധി താഴ്ന്ന പ്രദേശങ്ങളിൽ വെള്ളക്കെട്ട് റിപ്പോർട്ട് ചെയ്തിട്ടുണ്ട്. കിഴക്കൻ, പടിഞ്ഞാറൻ എക്സ്പ്രസ് ഹൈവേകളിൽ മഴവെള്ളം കെട്ടിക്കിടക്കുന്നത് ഗതാഗതക്കുരുക്കിന് കാരണമായി.

തുടർച്ചയായ മഴയെത്തുടർന്ന് മിഥി നദിയിലെ ജലനിരപ്പ് ഉയർന്നു. ദിവസം മുഴുവൻ മഴ തുടർന്നാൽ വെള്ളപ്പൊക്ക സാധ്യതയുണ്ടെന്ന് മുന്നറിയിപ്പുണ്ട്. സമുദ്രനിരപ്പ് 3.32 മീറ്ററിലെത്താൻ സാധ്യതയുള്ളതിനാൽ ഉദ്യോഗസ്ഥർ സ്ഥിതിഗതികൾ സൂക്ഷ്മമായി നിരീക്ഷിച്ചുവരികയാണ്.

അതേസമയം, വെള്ളപ്പൊക്ക സാധ്യതയുള്ള മേഖലകളിൽ അനാവശ്യമായി പുറത്തിറങ്ങുന്നത് ഒഴിവാക്കണമെന്ന് ബ്രിഹാൻ മുംബൈ മുനിസിപ്പൽ കോർപ്പറേഷൻ നിവാസികളോട് അഭ്യർഥിച്ചു. 

ദുരന്തനിവാരണ സംഘങ്ങൾ ജാഗ്രത പാലിക്കുകയും സ്ഥിരമായി വെള്ളം കെട്ടിക്കിടക്കുന്ന പ്രദേശങ്ങളിൽ അടിഞ്ഞുകൂടിയ മഴവെള്ളം ഒഴുക്കിവിടാനുള്ള മാർഗങ്ങൾ കണ്ടെത്തുകയും വേണം.

ഗതാഗത തടസ്സത്തിനും വെള്ളക്കെട്ടിനും സാധ്യതയുള്ളതിനാൽ യാത്രക്കാർ ജാഗ്രതയോടെ യാത്രകൾ ആസൂത്രണം ചെയ്യണമെന്ന് ഉദ്യോഗസ്ഥർ നിർദേശിച്ചു.