റായ്പൂര്‍ വിമാനത്താവളത്തിലെ എ.ടി.സി ഉപകരണങ്ങളില്‍ ഇടിമിന്നല്‍ ഏറ്റ് സിസ്റ്റം തകരാറിലായി. അഞ്ച് വിമാനങ്ങള്‍ വഴിതിരിച്ചുവിട്ടു; അറ്റകുറ്റപ്പണികള്‍ പുരോഗമിക്കുന്നു

റായ്പൂര്‍: ബുധനാഴ്ച വൈകുന്നേരം ഉണ്ടായ ഇടിമിന്നലിനെ തുടര്‍ന്ന് ഛത്തീസ്ഗഡിലെ സ്വാമി വിവേകാനന്ദ വിമാനത്താവളത്തിലെ വിമാന പ്രവര്‍ത്തനങ്ങള്‍ തടസ്സപ്പെട്ടു. ഇടിമിന്നലില്‍ വിമാനത്താവള ഉപകരണങ്ങള്‍ക്ക് കേടുപാടുകള്‍ സംഭവിച്ചതിനാല്‍ വിമാനങ്ങള്‍ വഴിതിരിച്ചുവിടേണ്ടി വന്നു.

കൊല്‍ക്കത്തയില്‍ നിന്നും ഹൈദരാബാദില്‍ നിന്നും വരുന്ന രണ്ട് വിമാനങ്ങള്‍ ഭുവനേശ്വറിലേക്കും, ഡല്‍ഹിയില്‍ നിന്ന് വരുന്ന വിമാനം ഭോപ്പാലിലേക്കും, മുംബൈയില്‍ നിന്നും പൂനെയില്‍ നിന്നും വരുന്ന വിമാനങ്ങള്‍ നാഗ്പൂരിലേക്കും അയച്ചു.

ഇടിമിന്നലില്‍ നാവിഗേഷന്‍ ഉപകരണങ്ങള്‍ക്ക് കേടുപാടുകള്‍ സംഭവിച്ചുവെന്നും സാങ്കേതിക സംഘം അത് നന്നാക്കാന്‍ പ്രവര്‍ത്തിക്കുന്നുണ്ടെന്നും വിമാന പ്രവര്‍ത്തനങ്ങള്‍ നിര്‍ത്തിവച്ചിരിക്കുകയാണെന്നും വിമാനത്താവള ഡയറക്ടര്‍ കെ കെ ലഹാരെ പറഞ്ഞു.

വിമാനത്താവളത്തിലും പരിസര പ്രദേശങ്ങളിലും വൈകുന്നേരം ഇടിമിന്നലുണ്ടാകുമെന്ന് മുന്നറിയിപ്പ് നല്‍കിയിരുന്നതായി കാലാവസ്ഥാ നിരീക്ഷകന്‍ ഡോ. ഗായത്രി വാണി പറഞ്ഞു.