ഓപ്പറേഷന്‍ സിന്ദൂര്‍ വെറും ഒരു 'ട്രെയിലര്‍' മാത്രം. ഇന്ത്യന്‍ സേനയുടെ നട്ടെല്ല് ബ്രഹ്‌മോസ്, പാകിസ്ഥാന്റെ ഓരോ ഇഞ്ചും തങ്ങളുടെ കൈയെത്തും ദൂരത്താണെന്ന് രാജ്നാഥ് സിംഗ്‌

ലഖ്നൗ: ലഖ്നൗവിലെ ബ്രഹ്‌മോസ് എയ്റോസ്പേസ് യൂണിറ്റില്‍ നിര്‍മ്മിച്ച ബ്രഹ്‌മോസ് മിസൈലുകളുടെ ആദ്യ ബാച്ച് ഫ്‌ലാഗ് ഓഫ് ചെയ്തു പ്രതിരോധ മന്ത്രി രാജ്നാഥ് സിംഗ്. പാകിസ്ഥാന് അദ്ദേഹം കര്‍ശന മുന്നറിയിപ്പ് നല്‍കി. അയല്‍രാജ്യത്തിന്റെ ഓരോ ഇഞ്ചും ബ്രഹ്‌മോസിന്റെ പരിധിയിലാണെന്ന് അദ്ദേഹം പറഞ്ഞു.

ഓപ്പറേഷന്‍ സിന്ദൂരിലെ വിജയത്തിന് ഇന്ത്യന്‍ സായുധ സേനയെ പ്രശംസിച്ച രാജ്നാഥ്, അതൊരു 'ട്രെയിലര്‍' മാത്രമാണെന്ന് ചൂണ്ടിക്കാട്ടി. ബ്രഹ്‌മോസിനെ പ്രശംസിച്ചുകൊണ്ട് പ്രതിരോധ മന്ത്രി, ഇന്ത്യ ശത്രുക്കളെ വെറുതെ വിടില്ലെന്ന് ഓപ്പറേഷന്‍ സിന്ദൂരിലൂടെ തെളിയിച്ചതായി പറഞ്ഞു.  

'വിജയം ഇനി നമുക്ക് ഒരു ചെറിയ സംഭവമല്ലെന്ന് ഓപ്പറേഷന്‍ സിന്ദൂര്‍ തെളിയിച്ചിട്ടുണ്ട്. വിജയം നമ്മുടെ ശീലമായി മാറിയിരിക്കുന്നു...

നമ്മുടെ എതിരാളികള്‍ക്ക് ഇനി ബ്രഹ്‌മോസില്‍ നിന്ന് രക്ഷപ്പെടാന്‍ കഴിയില്ലെന്ന് രാജ്യത്തിന് ഉറപ്പുണ്ട്. പാകിസ്ഥാന്‍ പ്രദേശത്തിന്റെ ഓരോ ഇഞ്ചും ഇപ്പോള്‍ നമ്മുടെ ബ്രഹ്‌മോസിന്റെ കൈയെത്തും ദൂരത്താണ്,' അദ്ദേഹം പറഞ്ഞു. 

'ബ്രഹ്‌മോസ് വെറുമൊരു മിസൈല്‍ മാത്രമല്ല, ഇന്ത്യയുടെ വളര്‍ന്നുവരുന്ന തദ്ദേശീയ കഴിവുകളുടെ പ്രതീകമാണ്. വേഗത, കൃത്യത, ശക്തി എന്നിവയുടെ ഈ സംയോജനം ബ്രഹ്‌മോസിനെ ലോകത്തിലെ ഏറ്റവും മികച്ച മിസൈലുകളില്‍ ഒന്നാക്കി മാറ്റുന്നു,' അദ്ദേഹം പറഞ്ഞു,

ഇന്ത്യന്‍ സായുധ സേനയുടെ 'നട്ടെല്ലായി' ബ്രഹ്‌മോസ് മാറിയിരിക്കുന്നുവെന്നും അദ്ദേഹം കൂട്ടിച്ചേര്‍ത്തു.