ഡൽഹി സ്ഫോടനം: ജെയ്‌ഷെ പിന്തുണയുള്ള വൈറ്റ് കോളർ ഭീകര സംഘടനയുമായി ബന്ധമുണ്ടെന്നാരോപിച്ച് ശ്രീനഗർ സ്വദേശി അറസ്റ്റിൽ

ശ്രീനഗര്‍: വൈറ്റ് കോളര്‍ ഭീകരവാദ മൊഡ്യൂള്‍ കേസുമായി ബന്ധപ്പെട്ട് ജമ്മു കശ്മീര്‍ പോലീസിന്റെ സംസ്ഥാന അന്വേഷണ ഏജന്‍സി (എസ്ഐഎ) ശനിയാഴ്ച ശ്രീനഗറില്‍ ഒരാളെ അറസ്റ്റ് ചെയ്തതായി ഉദ്യോഗസ്ഥര്‍ പറഞ്ഞു.

നവംബര്‍ 10 ന് ഡല്‍ഹിയിലെ ചെങ്കോട്ടയ്ക്ക് സമീപം നടന്ന കാര്‍ സ്ഫോടനത്തിന് പിന്നിലെ മൊഡ്യൂളിനെക്കുറിച്ചുള്ള തുടര്‍ അന്വേഷണത്തിന്റെ ഭാഗമായി ബറ്റമാലൂ പ്രദേശത്തെ തുഫൈല്‍ നിയാസ് ഭട്ട് എന്നയാളാണ് അറസ്റ്റിലായതെന്ന് അവര്‍ കൂട്ടിച്ചേര്‍ത്തു. സ്ഫോടനത്തില്‍ 13 പേര്‍ കൊല്ലപ്പെട്ടു.

ഒക്ടോബര്‍ മധ്യത്തില്‍ നൗഗാമിലെ ബന്‍പോറയില്‍ ചുമരുകളില്‍ ഒട്ടിച്ചിരുന്ന പോലീസിനെയും സുരക്ഷാ സേനയെയും ഭീഷണിപ്പെടുത്തുന്ന പോസ്റ്ററുകള്‍ ശ്രീനഗര്‍ പോലീസ് പരിശോധിക്കാന്‍ തുടങ്ങിയതോടെയാണ് ഈ ശൃംഖല പുറത്തുവന്നത്.

ശ്രീനഗര്‍ സീനിയര്‍ പോലീസ് സൂപ്രണ്ട് ഡോ. ജി.വി. സുന്ദീപ് ചക്രവര്‍ത്തി നേരിട്ട് അന്വേഷണത്തിന് മേല്‍നോട്ടം വഹിച്ചു, സിസിടിവി വിശകലനം ആദ്യ മൂന്ന് പ്രതികളായ ആരിഫ് നിസാര്‍ ദാര്‍ എന്ന സാഹില്‍, യാസിര്‍ ഉല്‍ അഷ്റഫ്, മഖ്സൂദ് അഹമ്മദ് ദാര്‍ എന്ന ഷാഹിദ് എന്നിവരെ അറസ്റ്റ് ചെയ്യുന്നതിലേക്ക് നയിച്ചു.

അവരുടെ ചോദ്യം ചെയ്യലില്‍, മുന്‍ പാരാമെഡിക്ക് മൗലവി ഇര്‍ഫാന്‍ അഹമ്മദിനെ അറസ്റ്റ് ചെയ്തു. പോസ്റ്ററുകള്‍ വിതരണം ചെയ്തതും ഡോക്ടര്‍മാരെ തീവ്രവാദത്തിലേക്ക് നയിച്ചതും ഇയാളാണെന്ന് ആരോപിക്കപ്പെടുന്നു.

തുടര്‍ന്ന് അന്വേഷണ ഉദ്യോഗസ്ഥര്‍ ഫരീദാബാദിലെ അല്‍ ഫലാഹ് സര്‍വകലാശാലയിലേക്ക് പോയി. അവിടെ ഡോ. മുസാഫര്‍ ഗനായെയും ഡോ. ഷഹീന്‍ സയീദിനെയും കസ്റ്റഡിയിലെടുത്തു. 2,900 കിലോഗ്രാം സ്‌ഫോടകവസ്തുക്കള്‍ പിടിച്ചെടുത്തു.

ചെങ്കോട്ടയ്ക്ക് സമീപം 13 പേരുടെ മരണത്തിനിടയാക്കിയ സ്ഫോടകവസ്തുക്കള്‍ നിറച്ച കാര്‍ ഓടിച്ചിരുന്ന ഉമര്‍ നബി, ഡോ. ഗനായ്, ഒളിവില്‍ പോയ മുസാഫര്‍ റാത്തര്‍ എന്നീ മൂന്ന് ഡോക്ടര്‍മാരുടെ ഒരു പ്രധാന സംഘമാണ് മൊഡ്യൂള്‍ പ്രവര്‍ത്തിപ്പിച്ചതെന്ന് അന്വേഷണ ഉദ്യോഗസ്ഥര്‍ വിശ്വസിക്കുന്നു.