യൂറോപ്യൻ യൂണിയൻ ഉപരോധം പാലിച്ച് റിലയൻസ്: റഷ്യൻ ക്രൂഡ് ഓയിൽ ഇറക്കുമതി നിർത്തി

ഡല്‍ഹി: യൂറോപ്യന്‍ യൂണിയന്‍ ഏര്‍പ്പെടുത്തിയ ഉപരോധങ്ങള്‍ പാലിക്കുന്നതിന്റെ ഭാഗമായി ഗുജറാത്തിലെ ജാംനഗറിലുള്ള കയറ്റുമതി ആവശ്യത്തിനുള്ള റിഫൈനറിയില്‍ റഷ്യന്‍ ക്രൂഡ് ഓയില്‍ ഉപയോഗിക്കുന്നത് നിര്‍ത്തിയതായി റിലയന്‍സ് ഇന്‍ഡസ്ട്രീസ് ലിമിറ്റഡ് അറിയിച്ചു.

ഇന്ത്യയില്‍ റഷ്യന്‍ എണ്ണയുടെ ഏറ്റവും വലിയ വാങ്ങലുകാരില്‍ ഒന്നാണ് റിലയന്‍സ്. ജാംനഗറിലെ അവരുടെ ഭീമാകാരമായ എണ്ണ ശുദ്ധീകരണ സമുച്ചയത്തില്‍ വെച്ച് ഈ എണ്ണ സംസ്‌കരിച്ച് പെട്രോള്‍, ഡീസല്‍ തുടങ്ങിയ ഇന്ധനങ്ങളാക്കി മാറ്റുന്നു.

ഈ സമുച്ചയത്തില്‍ രണ്ട് റിഫൈനറികള്‍ ഉണ്ട്. ഒന്ന് യൂറോപ്യന്‍ യൂണിയനിലേക്കും യുഎസിലേക്കും മറ്റ് വിപണികളിലേക്കും ഇന്ധനം കയറ്റുമതി ചെയ്യുന്ന എസ്ഇസഡ് യൂണിറ്റും, മറ്റൊന്ന് ആഭ്യന്തര വിപണിക്ക് വേണ്ടിയുള്ള പഴയ യൂണിറ്റും.

റിലയന്‍സിന്റെ ഒരു വലിയ വിപണിയായ യൂറോപ്യന്‍ യൂണിയന്‍ റഷ്യന്‍ ഊര്‍ജ്ജ വരുമാനം ലക്ഷ്യമിട്ട് നിരവധി ഉപരോധങ്ങള്‍ ഏര്‍പ്പെടുത്തിയിട്ടുണ്ട്. 

റഷ്യന്‍ ക്രൂഡ് ഓയിലില്‍ നിന്ന് ഉത്പാദിപ്പിക്കുന്ന ഇന്ധനങ്ങളുടെ ഇറക്കുമതിയും വില്‍പ്പനയും നിയന്ത്രിക്കുന്ന നടപടികളും ഇതില്‍ ഉള്‍പ്പെടുന്നു.