ഗോരേഗാവ് പ്രദേശത്തെ റെസിഡൻഷ്യൽ കെട്ടിടത്തിലുണ്ടായ വൻ തീപിടുത്തത്തിൽ മൂന്ന് പേർ മരിച്ചു

മുംബൈ: മുംബൈയിലെ ഗോരേഗാവ് പ്രദേശത്തെ ഒരു റെസിഡന്‍ഷ്യല്‍ കെട്ടിടത്തില്‍ പുലര്‍ച്ചെയുണ്ടായ തീപിടുത്തത്തില്‍ ശ്വാസംമുട്ടി ഒരേ കുടുംബത്തിലെ മൂന്ന് പേര്‍ മരിച്ചു. അഗ്‌നിശമന സേനാംഗങ്ങള്‍ തീ നിയന്ത്രണവിധേയമാക്കി.

ഗോരേഗാവ് അധികാരപരിധിയിലുള്ള ഭഗത് സിംഗ് നഗറിലെ രാജാറാം ലെയ്നിലുള്ള ഒരു ഒറ്റനില കെട്ടിടത്തിലാണ് പുലര്‍ച്ചെ 3:06 ഓടെ തീപിടുത്തമുണ്ടായത്.

താഴത്തെ നിലയിലും ഒന്നാം നിലയിലുമാണ് തീപിടുത്തമുണ്ടായതെന്നും തുടര്‍ന്ന് വൈദ്യുത വയറിംഗും വീട്ടുപകരണങ്ങളും കത്തിനശിച്ചതായും പിന്നീട് അപകടകരമായ രീതിയില്‍ പടര്‍ന്നതായും ഉദ്യോഗസ്ഥര്‍ അറിയിച്ചു.

പുക നിറഞ്ഞ വീട്ടില്‍ നിന്ന് ഗുരുതരമായി പൊള്ളലേറ്റ മൂന്ന് പേരെ അഗ്‌നിശമന സേനാംഗങ്ങള്‍ പുറത്തെടുത്ത് ട്രോമ കെയര്‍ ആശുപത്രിയിലേക്ക് കൊണ്ടുപോയി. കനത്ത പുകയ്ക്കിടയില്‍ ശ്വാസംമുട്ടിയാണ് മൂന്ന് പേരും മരിച്ചതെന്ന് ഡോക്ടര്‍മാര്‍ പ്രഖ്യാപിച്ചു. 

ഹര്‍ഷദ പവാസ്‌കര്‍ (19), കുശാല്‍ പവാസ്‌കര്‍ (12), സഞ്‌ജോഗ് പവാസ്‌കര്‍ (48) എന്നിവരാണ് കൊല്ലപ്പെട്ടത്.