യുഎസുമായുള്ള വ്യാപാര ചര്‍ച്ചകള്‍ പുരോഗമിക്കുന്നതിനിടെ മലേഷ്യയില്‍ മാര്‍ക്കോ റൂബിയോയെ കണ്ട് ജയ്ശങ്കര്‍

ക്വാലലംപൂര്‍: മലേഷ്യയിലെ ക്വാലാലംപൂരില്‍ നടക്കുന്ന ആസിയാന്‍ ഉച്ചകോടിക്കിടെ വിദേശകാര്യ മന്ത്രി ഡോ. എസ്. ജയശങ്കര്‍ യുഎസ് സ്റ്റേറ്റ് സെക്രട്ടറി മാര്‍ക്കോ റൂബിയോയുമായി കൂടിക്കാഴ്ച നടത്തി. ഉഭയകക്ഷി ബന്ധം മെച്ചപ്പെടുത്തുന്നതില്‍ ശ്രദ്ധ കേന്ദ്രീകരിച്ച് ഇരു നേതാക്കളും നിരവധി കാര്യങ്ങളില്‍ ചര്‍ച്ച നടത്തി.

'ഇന്ന് രാവിലെ ക്വാലാലംപൂരില്‍ വെച്ച്  മാര്‍ക്കോ റൂബിയോയുമായി കാണാന്‍ കഴിഞ്ഞതില്‍ സന്തോഷം. നമ്മുടെ ഉഭയകക്ഷി ബന്ധങ്ങളെയും പ്രാദേശിക, ആഗോള വിഷയങ്ങളെയും കുറിച്ചുള്ള ചര്‍ച്ചയെ അഭിനന്ദിച്ചു,' ജയശങ്കര്‍ എക്‌സില്‍ കുറിച്ചു. 

ഇന്ത്യയും അമേരിക്കയും തമ്മിലുള്ള വ്യാപാര ചര്‍ച്ചകള്‍ പുരോഗമിക്കുന്ന സമയത്താണ് ഇരു നേതാക്കളും തമ്മിലുള്ള കൂടിക്കാഴ്ച.

ചര്‍ച്ചകള്‍ 'നല്ല രീതിയില്‍ പുരോഗമിക്കുന്നു' എന്ന് ഇരുപക്ഷവും പറഞ്ഞിട്ടുണ്ടെങ്കിലും, തലയ്ക്ക് നേരെ 'തോക്കുമായി' ഇന്ത്യ ഒരു കരാറില്‍ ഏര്‍പ്പെടില്ലെന്ന് കേന്ദ്ര വാണിജ്യ വ്യവസായ മന്ത്രി പീയൂഷ് ഗോയല്‍ ഉറപ്പിച്ചു പറഞ്ഞു.

'ഞങ്ങള്‍ യുഎസുമായി സംസാരിക്കുന്നുണ്ട്, പക്ഷേ ഞങ്ങള്‍ തിടുക്കത്തില്‍ ഇടപാടുകള്‍ നടത്തുന്നില്ല, സമയപരിധി നിശ്ചയിച്ചോ തലയില്‍ തോക്ക് വച്ചോ അല്ല ഞങ്ങള്‍ ഇടപാടുകള്‍ നടത്തുന്നത്,' ഗോയല്‍ കഴിഞ്ഞ ആഴ്ച ജര്‍മ്മനിയില്‍ നടന്ന ഒരു പരിപാടിയില്‍ പറഞ്ഞു.