ഹീറോയിസം സിനിമയിലൊക്കെ കൊള്ളാം. എന്നാല്‍ ജീവിതത്തില്‍ ശ്രദ്ധിച്ചില്ലെങ്കില്‍ അപകടം ഉറപ്പ് ! സെയ്ഫ് അലി ഖാന് കിട്ടിയ ആറ് കുത്തുകളില്‍ ഒരു കുത്ത് സുഷുമ്‌നാ നാഡിക്ക് സമീപം. പക്ഷാഘാതം സംഭവിക്കുമായിരുന്നു. രക്ഷപ്പെട്ടത് തലനാരിഴക്കെന്ന് ഡോക്ടര്‍മാര്‍

മുംബൈ: ബോളിവുഡ് നടന്‍ സെയ്ഫ് അലി ഖാനെതിരായ ആക്രമണം രാജ്യത്തെയാകെ ഞെട്ടിച്ചിരിക്കുകയാണ്.

ബാന്ദ്രയിലെ വീട്ടില്‍ വച്ച് നടനു നേരെയുണ്ടായ ആക്രമണത്തിന് ശേഷം അദ്ദേഹത്തെ മുംബൈയിലെ ലീലാവതി ആശുപത്രിയില്‍ പ്രവേശിപ്പിച്ചു. ഇവിടെ അദ്ദേഹത്തിന് രണ്ട് ശസ്ത്രക്രിയകള്‍ നടത്തിയിരുന്നു.

ശരീരത്തിന്റെ വിവിധ ഭാഗങ്ങളില്‍ ആറ് തവണ കുത്തേറ്റിട്ടും താരം ധൈര്യം കൈവിടാതെ അക്രമിയില്‍ നിന്ന് കുടുംബത്തെ സംരക്ഷിക്കുകയായിരുന്നു. എന്നാല്‍ താരത്തിന് വലിയ അപകടം സംഭവിച്ചേനെ എന്നാണ് ഇപ്പോള്‍ ഡോക്ടര്‍ പറഞ്ഞത്

സെയ്ഫ് അലി ഖാനേറ്റ ആറ് കുത്തുകളില്‍, ഒരു കുത്ത് അദ്ദേഹത്തിന്റെ സുഷുമ്‌നാ നാഡിക്ക് സമീപമായിരുന്നുവെന്ന് പറയപ്പെടുന്നു, അത് എല്ലിനടുത്തായിരുന്നുവെങ്കില്‍ അദ്ദേഹത്തിന് പക്ഷാഘാതം സംഭവിക്കുമായിരുന്നു.

താരം കഷ്ടിച്ച് രക്ഷപെട്ടുവെന്നാണ് ലീലാവതി ഹോസ്പിറ്റലിലെ ന്യൂറോ സര്‍ജന്‍ ഡോ. നിതിന്‍ ഡാങ്കെ പറയുന്നത്.

പുലര്‍ച്ചെ രണ്ട് മണിയോടെയാണ് സെയ്ഫ് അലി ഖാനെ ലീലാവതി ആശുപത്രിയില്‍ പ്രവേശിപ്പിച്ചതെന്ന് ഡോക്ടര്‍ നിതിന്‍ ഡാങ്കെ പറഞ്ഞു. നട്ടെല്ലിന് ഗുരുതരമായ ക്ഷതമേറ്റ അദ്ദേഹത്തിന്റെ നട്ടെല്ലില്‍ കത്തി കുടുങ്ങിയിരുന്നു. ഉടന്‍ തന്നെ ശസ്ത്രക്രിയ നടത്തി കത്തി നീക്കം ചെയ്യുകയും രക്തമൊഴുക്ക് തടയുകയും ചെയ്തു. 

കൂടാതെ, ഇടതുകൈയില്‍ ആഴത്തിലുള്ള രണ്ട് മുറിവുകളും കഴുത്തില്‍ ഒരു മുറിവും ഉണ്ടായിരുന്നു, അവ പ്ലാസ്റ്റിക് സര്‍ജറി ടീം ചികിത്സിച്ചു. സെയ്ഫ് അലി ഖാന്‍ ഇപ്പോള്‍ പൂര്‍ണ്ണമായും സുഖം പ്രാപിക്കുകയും അപകടനില തരണം ചെയ്യുകയും ചെയ്തുവെന്ന് ഡോക്ടര്‍ പറഞ്ഞു

സുഷുമ്‌നാ നാഡി ശരീരത്തിന്റെ ഒരു പ്രധാന ഭാഗമാണെന്നും ഡോക്ടര്‍ പറഞ്ഞു. ആ കത്തി സെയ്ഫിന്റെ സുഷുമ്‌നാ നാഡിയില്‍ തട്ടിയിരുന്നെങ്കില്‍ താരത്തിന് തളര്‍ച്ച സംഭവിക്കുമായിരുന്നു. അപകടനില തരണം ചെയ്തിട്ടുണ്ടെങ്കിലും. ഡോക്ടര്‍മാരുടെ നിരീക്ഷണത്തിലാണ് താരം. 

അഞ്ച് മണിക്കൂറോളം ശസ്ത്രക്രിയയ്ക്ക് വിധേയനായ അദ്ദേഹം രാത്രി വരെ അബോധാവസ്ഥയിലായിരുന്നുവെന്നാണ് റിപ്പോര്‍ട്ട്.