മുംബൈയെ നശിപ്പിക്കുന്നത് ദക്ഷിണേന്ത്യക്കാര്‍. ഡാന്‍സ് ബാറുകള്‍ നടത്തുന്നതും അവരാണ്; മര്‍ദ്ദനത്തിന് പിന്നാലെ വിദ്വേഷ പ്രസംഗവുമായി ശിവസേന എംഎല്‍എ

മുംബൈ:  മഹാരാഷ്ട്രയില്‍ എംഎല്‍എ ഹോസ്റ്റലിലെ കാന്റീന്‍ ജീവനക്കാരനെ മര്‍ദ്ദിച്ചതിന് പിന്നാലെ, എംഎല്‍എ സഞ്ജയ് ഗെയ്ക്വാഡ് വംശീയ അധിക്ഷേപവുമായി വീണ്ടും വിവാദത്തില്‍.

മോശം ഭക്ഷണം നല്‍കിയെന്നാരോപിച്ച് കാന്റീന്‍ ജീവനക്കാരനെ സഞ്ജയ് ഗെയ്ക്വാഡ് തന്റെ സഹായികളുമായി ചേര്‍ന്ന് ക്രൂരമായി മര്‍ദ്ദിച്ചിരുന്നു. തോര്‍ത്ത് ഉടുത്ത് എത്തിയ എംഎല്‍എയുടെ ഈ നടപടിയുടെ ദൃശ്യങ്ങള്‍ സാമൂഹ്യ മാധ്യമങ്ങളില്‍ പ്രചരിച്ചതോടെ ശക്തമായ വിമര്‍ശനമാണ് ഉയര്‍ന്നത്.

സംഭവത്തിന് ശേഷം, സഞ്ജയ് ഗെയ്ക്വാഡ് ദക്ഷിണേന്ത്യക്കാരെതിരെ വിദ്വേഷപരമായ പരാമര്‍ശം നടത്തി.

'മുംബൈയെ നശിപ്പിക്കുന്നത് ദക്ഷിണേന്ത്യക്കാരാണ്. ഹോട്ടല്‍ നടത്തിപ്പുകാരന്‍ ദക്ഷിണേന്ത്യക്കാരനാണ്, നല്ല ഭക്ഷണം നല്‍കാന്‍ അറിയില്ല. ഡാന്‍സ് ബാറുകള്‍ ഉള്‍പ്പെടെ മുംബൈയില്‍ ദക്ഷിണേന്ത്യക്കാര്‍ തന്നെ നടത്തുന്നു,'എന്ന് എംഎല്‍എ ആരോപിച്ചു.

അതേസമയം, എംഎല്‍എയുടെ മര്‍ദ്ദനത്തിന് ഇരയായ കാന്റീന്‍ നടത്തിപ്പുകാരുടെ ലൈസന്‍സ് റദ്ദാക്കിയതായി അധികൃതര്‍ അറിയിച്ചു.

കാന്റീന്‍ ജീവനക്കാരനെ മര്‍ദ്ദിച്ച സംഭവവും, അതിനെത്തുടര്‍ന്ന് ദക്ഷിണേന്ത്യക്കാരെതിരെ നടത്തിയ വിവാദ പരാമര്‍ശവും എംഎല്‍എ സഞ്ജയ് ഗെയ്ക്വാഡിനെ ശക്തമായ വിമര്‍ശനത്തിന് വിധേയനാക്കിയിരിക്കുകയാണ്.