'ഒരു സ്ഥാപനത്തിന് പരിധിയില്ലാത്ത അധികാരങ്ങൾ നൽകുന്നത് ജനാധിപത്യത്തിന് ആശങ്കാജനകമാണ്', മുൻ ചീഫ് ജസ്റ്റിസ് സഞ്ജീവ് ഖന്ന

ഡല്‍ഹി: ഒരു നിര്‍ദ്ദേശത്തിന്റെ ഭരണഘടനാ സാധുത അതിലെ വ്യവസ്ഥകള്‍ അഭികാമ്യമോ ആവശ്യമോ ആണെന്ന് സൂചിപ്പിക്കുന്നില്ലെന്ന്, ഒരേസമയം തിരഞ്ഞെടുപ്പുകള്‍ നടത്തുന്നതിനുള്ള ബില്‍ പുനഃപരിശോധിക്കുന്ന പാര്‍ലമെന്ററി കമ്മിറ്റിയോട് മുന്‍ ചീഫ് ജസ്റ്റിസ് സഞ്ജീവ് ഖന്ന പറഞ്ഞു.

ഒരു നിര്‍ദ്ദേശം ഭരണഘടനയ്ക്ക് അനുസൃതമാണെന്ന് അംഗീകരിക്കുന്നത് സമൂഹത്തിനോ ജനാധിപത്യത്തിനോ ഉചിതമോ ആവശ്യമോ ആണെന്ന് അര്‍ത്ഥമാക്കുന്നില്ലെന്ന് അദ്ദേഹം വ്യക്തമാക്കി.

ഭരണഘടനാ ഭേദഗതി ബില്‍ രാജ്യത്തിന്റെ ഫെഡറല്‍ ഘടനയെ ദുര്‍ബലപ്പെടുത്തുന്നതിനെക്കുറിച്ച് വാദങ്ങള്‍ ഉന്നയിക്കാമെന്ന് കമ്മിറ്റിക്ക് എഴുതിയ അഭിപ്രായത്തില്‍ ജസ്റ്റിസ് ഖന്ന പറഞ്ഞു.

ബിജെപി എംപി പി പി ചൗധരിയുടെ നേതൃത്വത്തിലുള്ള പാര്‍ലമെന്ററി കമ്മിറ്റിയുമായി അഭിപ്രായങ്ങള്‍ പങ്കുവെച്ച മിക്ക വിദഗ്ധരും ഈ നിര്‍ദ്ദേശങ്ങള്‍ ഭരണഘടനാ വിരുദ്ധമാണെന്ന ആരോപണം നിരസിച്ചു.

പക്ഷേ ബില്ലിലെ നിലവിലെ വ്യവസ്ഥകളില്‍ ചില പ്രശ്‌നങ്ങള്‍ ഉന്നയിച്ചു. ബില്ലില്‍ തിരഞ്ഞെടുപ്പ് കമ്മീഷന് നല്‍കിയിരിക്കുന്ന അധികാരങ്ങളുടെ വ്യാപ്തിയെ കുറിച്ച് ജസ്റ്റിസ് ഖന്നയും മറ്റ് ചില മുന്‍ ചീഫ് ജസ്റ്റിസുമാരും ആശങ്കകള്‍ ഉന്നയിക്കുന്നു.

ലോക്സഭാ തിരഞ്ഞെടുപ്പിനൊപ്പം ഒരു സംസ്ഥാന നിയമസഭയിലേക്കുള്ള തിരഞ്ഞെടുപ്പും ഒരേസമയം നടത്താന്‍ കഴിയില്ലെന്ന് തീരുമാനിക്കാന്‍ തിരഞ്ഞെടുപ്പ് കമ്മീഷന് 'പരിധിയില്ലാത്ത വിവേചനാധികാരം' നിര്‍ദ്ദിഷ്ട ബില്‍ നല്‍കുന്നുണ്ടെന്ന് അദ്ദേഹം പാര്‍ലമെന്ററി കമ്മിറ്റിയെ അറിയിച്ചു.

ഇക്കാര്യത്തില്‍ രാഷ്ട്രപതിക്ക് ശുപാര്‍ശകള്‍ നല്‍കാനുള്ള അധികാരവും കമ്മീഷന് നല്‍കിയിട്ടുണ്ട്.