സാന്താക്ലോസിനെ അപമാനിച്ചെന്ന് ആരോപണം; എഎപി നേതാക്കൾക്കെതിരെ കേസ്

ഡല്‍ഹി: മതവികാരം വ്രണപ്പെടുത്തിയെന്നാരോപിച്ച് ആം ആദ്മി പാര്‍ട്ടി (എഎപി) നേതാക്കളായ സൗരഭ് ഭരദ്വാജ്, സഞ്ജയ് ഝാ, ആദില്‍ അഹമ്മദ് ഖാന്‍ എന്നിവര്‍ക്കെതിരെ ഡല്‍ഹി പോലീസ് എഫ്ഐആര്‍ രജിസ്റ്റര്‍ ചെയ്തു. 

ക്രിസ്ത്യന്‍ സമൂഹത്തിന്റെ പവിത്രമായ പ്രതീകമായ സാന്താക്ലോസിനെ അവഹേളിക്കുന്ന രീതിയില്‍ ചിത്രീകരിച്ചുവെന്നാരോപിച്ചാണ് കേസ്. അഭിഭാഷകയായ ഖുഷ്ബു ജോര്‍ജ് നല്‍കിയ പരാതിയുടെ അടിസ്ഥാനത്തിലാണ് എഫ്ഐആര്‍ രജിസ്റ്റര്‍ ചെയ്തത്.

2025 ഡിസംബര്‍ 17, 18 തീയതികളില്‍ ഈ നേതാക്കളുടെ ഔദ്യോഗിക സോഷ്യല്‍ മീഡിയ അക്കൗണ്ടുകളില്‍ ഒരു വീഡിയോ പങ്കിട്ടതിനെ തുടര്‍ന്നാണ് വിവാദം ആരംഭിച്ചതെന്ന് പരാതിയില്‍ പറയുന്നു. 

ഡല്‍ഹിയിലെ കൊണാട്ട് പ്ലേസില്‍ നടന്ന ഒരു രാഷ്ട്രീയ സ്‌കിറ്റിന്റെ ഭാഗമായിരുന്നു ഈ വീഡിയോ. ക്രിസ്ത്യന്‍ സമൂഹത്തിന്റെ ആദരണീയമായ മത-സാംസ്‌കാരിക പ്രതീകമായ സാന്താക്ലോസിനെ അങ്ങേയറ്റം അവഹേളിക്കുന്നതും കുറ്റകരവുമായ രീതിയില്‍ വീഡിയോയില്‍ ചിത്രീകരിച്ചുവെന്നാണ് ആരോപണം.