രാജ്യത്ത് രാഷ്ട്രീയമായി വ്യത്യാസങ്ങളുണ്ടെങ്കിലും രാജ്യത്തിന്റെ അതിര്‍ത്തി കടക്കുമ്പോള്‍ നമ്മള്‍ ഇന്ത്യക്കാരായി മാറുന്നു. ഞാൻ രാജ്യത്തെ സേവിക്കാൻ വന്നതാണ്. ദേശീയ താൽപ്പര്യത്തിനായി പ്രവർത്തിക്കുന്നത് പാർട്ടി വിരുദ്ധ പ്രവർത്തനമാണെങ്കിൽ ആരോപണങ്ങൾ ഉന്നയിക്കുന്നവർ സ്വയം ചോദ്യം ചെയ്യണമെന്ന് ശശി തരൂർ

വാഷിംഗ്ടണ്‍: പാര്‍ട്ടിയില്‍ തനിക്കെതിരെ ഉയരുന്ന ശബ്ദങ്ങളോട് ആദ്യമായി പ്രതികരിച്ച് കോണ്‍ഗ്രസ് നേതാവ് ശശി തരൂര്‍. ദേശീയ താല്‍പ്പര്യത്തിനായി പ്രവര്‍ത്തിക്കുന്നത് പാര്‍ട്ടി വിരുദ്ധ പ്രവര്‍ത്തനമാണെങ്കില്‍, അത്തരം ആരോപണങ്ങള്‍ ഉന്നയിക്കുന്നവര്‍ സ്വയം ചോദ്യം ചെയ്യണമെന്ന് അദ്ദേഹം പറഞ്ഞു.

തരൂര്‍ ഇപ്പോള്‍ ഒരു സര്‍വകക്ഷി സംഘത്തോടൊപ്പം അമേരിക്കയിലാണ്. പഹല്‍ഗാം ആക്രമണത്തിനും ഓപ്പറേഷന്‍ സിന്ദൂരിനും ശേഷം ഭീകരതയ്ക്കെതിരായ ഇന്ത്യയുടെ നിലപാട് അവതരിപ്പിക്കുന്നതിനാണ് സംഘം അവിടെ എത്തിയത്. 

ശശി തരൂരിന്റെ പ്രസ്താവനകളെ നിരവധി കോണ്‍ഗ്രസ് നേതാക്കള്‍ എതിര്‍ത്തിരുന്നു. അദ്ദേഹത്തെ ബിജെപി സര്‍ക്കാരിന്റെ സൂപ്പര്‍ വക്താവ് എന്ന് വിളിച്ചിരുന്നു.

തനിക്കെതിരെ ഉയര്‍ന്ന ശബ്ദങ്ങള്‍ക്ക് ശശി തരൂര്‍ മറുപടി നല്‍കി. ആരെങ്കിലും രാജ്യത്തിന് വേണ്ടി സേവനം ചെയ്യുന്നുണ്ടെങ്കില്‍, ഇത്തരം കാര്യങ്ങള്‍ അവരെ ബാധിക്കരുതെന്ന് അദ്ദേഹം പറഞ്ഞു.

രാജ്യതാല്‍പ്പര്യത്തിനായി പ്രവര്‍ത്തിക്കുന്നത് പാര്‍ട്ടി വിരുദ്ധ പ്രവര്‍ത്തനത്തിന്റെ ഭാഗമാണെന്ന് കരുതുന്ന ഏതൊരാളും സ്വയം ചോദ്യം ചെയ്യേണ്ടതുണ്ടെന്ന് തരൂര്‍ പറഞ്ഞു. നമ്മള്‍ ഇവിടെ ഒരു ദൗത്യത്തിലാണ്, ആവേശത്തില്‍ ആരെങ്കിലും നടത്തിയ പ്രസ്താവനയില്‍ സമയം കളയരുതെന്നും അദ്ദേഹം പറഞ്ഞു.

'ഞാന്‍ ഒരു ലോക്സഭാ എംപിയാണ്, എന്റെ കാലാവധി അവസാനിക്കാന്‍ 4 വര്‍ഷം കൂടി ബാക്കിയുണ്ട്. എന്തുകൊണ്ടാണ് ഇത്തരം ചോദ്യങ്ങള്‍ ഉന്നയിക്കുന്നതെന്ന് എനിക്കറിയില്ല.

രാജ്യത്ത് രാഷ്ട്രീയമായി വ്യത്യാസങ്ങളുണ്ടെങ്കിലും രാജ്യത്തിന്റെ അതിര്‍ത്തി കടക്കുമ്പോള്‍ നമ്മള്‍ ഇന്ത്യക്കാരായി മാറുന്നുവെന്ന് തരൂര്‍ പറഞ്ഞു. വൈറ്റ് ഹൗസുമായി ഒരു തരത്തിലുള്ള സങ്കീര്‍ണതയും സൃഷ്ടിക്കാന്‍ ഞാന്‍ ഇവിടെ വന്നിട്ടില്ലെന്ന് അദ്ദേഹം പറഞ്ഞു.