പ്രധാനമന്ത്രി മോദി ഇന്ന് സെമികോണ്‍ ഇന്ത്യ സമ്മേളനം ഉദ്ഘാടനം ചെയ്യും, എഐ, ഗവേഷണം തുടങ്ങിയ വിഷയങ്ങള്‍ ചര്‍ച്ച ചെയ്യും

ഡല്‍ഹി: സെമികോണ്‍ ഇന്ത്യ - 2025 സമ്മേളനം ചൊവ്വാഴ്ച പ്രധാനമന്ത്രി നരേന്ദ്ര മോദി ഉദ്ഘാടനം ചെയ്യും. ഇന്ത്യയുടെ സെമികണ്ടക്ടര്‍ ആവാസവ്യവസ്ഥയെ പ്രോത്സാഹിപ്പിക്കുക എന്നതാണ് ഇതിന്റെ ലക്ഷ്യം.

ബുധനാഴ്ച നടക്കുന്ന സിഇഒ റൗണ്ട് ടേബിളില്‍ പ്രധാനമന്ത്രി മോദിയും പങ്കെടുക്കുമെന്ന് തിങ്കളാഴ്ച പുറത്തിറക്കിയ പ്രസ്താവനയില്‍ പ്രധാനമന്ത്രിയുടെ ഓഫീസ് (പിഎംഒ) അറിയിച്ചു.

ചൊവ്വാഴ്ച ആരംഭിക്കുന്ന മൂന്ന് ദിവസത്തെ സമ്മേളനത്തില്‍ സെമികോണ്‍ ഇന്ത്യ പ്രോഗ്രാമിന്റെ പുരോഗതി, സെമികണ്ടക്ടര്‍ ഫാബ്, അഡ്വാന്‍സ്ഡ് പാക്കേജിംഗ് പ്രോജക്ടുകള്‍, ഗവേഷണ വികസനത്തിലെയും കൃത്രിമബുദ്ധിയിലെയും നൂതനാശയങ്ങള്‍, നിക്ഷേപ അവസരങ്ങള്‍, സംസ്ഥാനതല നയ നിര്‍വ്വഹണം എന്നിവയെക്കുറിച്ചുള്ള സെഷനുകള്‍ നടക്കും.

48 രാജ്യങ്ങളില്‍ നിന്നുള്ള 2,500-ലധികം പ്രതിനിധികള്‍ ഉള്‍പ്പെടെ 20,750-ലധികം പേര്‍ പങ്കെടുക്കുന്ന പരിപാടിയാണിത്.

ഇന്ത്യയെ സെമികണ്ടക്ടര്‍ ഡിസൈന്‍, നിര്‍മ്മാണം, സാങ്കേതിക വികസനം എന്നിവയുടെ കേന്ദ്രമാക്കി മാറ്റുന്നതിനായി 2022-ല്‍ ബെംഗളൂരുവിലും 2023-ല്‍ ഗാന്ധിനഗറിലും 2024-ല്‍ ഗ്രേറ്റര്‍ നോയിഡയിലും സമ്മേളനങ്ങള്‍ സംഘടിപ്പിച്ചു.