വിപണിയിൽ നേട്ടത്തോടെ തുടക്കം: ഐടി ഓഹരികളിൽ വൻ കുതിപ്പ്; സെൻസെക്സ് 300 പോയിന്റ് ഉയർന്നു

മുംബൈ: ഐടി ഓഹരികളിലെ ശക്തമായ വാങ്ങലും വിദേശ നിക്ഷേപത്തിന്റെ തിരിച്ചുവരവും മൂലം ഇന്ത്യന്‍ ഓഹരി വിപണിയില്‍ ഇന്ന് നേട്ടത്തോടെ തുടക്കം.

ആഗോള വിപണികളിലെ അനുകൂല തരംഗവും ആഭ്യന്തര വിപണിക്ക് കരുത്തേകി. വ്യാപാരത്തിന്റെ ആദ്യ മണിക്കൂറില്‍ ബിഎസ്ഇ സെന്‍സെക്‌സ് 303 പോയിന്റ് ഉയര്‍ന്ന് 82,579.16 ലും എന്‍എസ്ഇ നിഫ്റ്റി 85.1 പോയിന്റ് നേട്ടത്തില്‍ 25,567.60 ലും എത്തി.

ടെക് മഹിന്ദ്ര, ഇന്‍ഫോസിസ്, എച്ച്സിഎല്‍ ടെക്, ടിസിഎസ് തുടങ്ങിയ പ്രമുഖ ഐടി കമ്പനികളുടെ ഓഹരികള്‍ വന്‍ നേട്ടമുണ്ടാക്കി.

ബുധനാഴ്ച വിദേശ നിക്ഷേപകര്‍ 2,991.64 കോടി രൂപയുടെ ഓഹരികള്‍ വാങ്ങി. ആഭ്യന്തര നിക്ഷേപകര്‍ 5,118.57 കോടി രൂപയുടെ ഓഹരികളും വാങ്ങിക്കൂട്ടി. ഇത് വിപണിയില്‍ വലിയ ആത്മവിശ്വാസം നല്‍കി.

ഏഷ്യന്‍ വിപണികളില്‍ ദക്ഷിണ കൊറിയയുടെ കോസ്പി, ജപ്പാന്റെ നിക്കി എന്നിവ ലാഭത്തിലാണ്. എന്നാല്‍ ഷാങ്ഹായ്, ഹോങ്കോംഗ് വിപണികള്‍ നഷ്ടം രേഖപ്പെടുത്തി.

രാജ്യാന്തര വിപണിയില്‍ ബ്രെന്റ് ക്രൂഡ് ഓയില്‍ വില നേരിയ തോതില്‍ ഉയര്‍ന്ന് ബാരലിന് 71.03 ഡോളറിലെത്തി.