'അക്രമമില്ല, ആള്‍ക്കൂട്ടക്കൊലയില്ല': ബംഗ്ലാദേശില്‍ ഇന്ത്യാ മാതൃകയിലുള്ള പ്രതിഷേധങ്ങള്‍ക്ക് ആഹ്വാനം ചെയ്ത് ശശി തരൂര്‍

ഡല്‍ഹി: ബംഗ്ലാദേശില്‍ ദീപു ചന്ദ്ര ദാസിന്റെ കൊലപാതകത്തെ അപലപിച്ച കോണ്‍ഗ്രസ് എംപി ശശി തരൂര്‍, ഇന്ത്യയിലും പ്രതിഷേധങ്ങള്‍ നടക്കുന്നുണ്ടെങ്കിലും 'ആള്‍ക്കൂട്ടമര്‍ദ്ദനത്തില്‍' ആരും കൊല്ലപ്പെടുന്നില്ലെന്ന് പറഞ്ഞു.

ഏതൊരു 'അക്രമശ്രമ'ത്തെയും ഇവിടെ പോലീസ് തടയുമെന്നും അദ്ദേഹം പറഞ്ഞു. തീവ്ര ഇന്ത്യാ വിരുദ്ധ വിദ്യാര്‍ത്ഥി നേതാവ് ഷെരീഫ് ഒസ്മാന്‍ ഹാദിയുടെ കൊലപാതകത്തെത്തുടര്‍ന്ന് ബംഗ്ലാദേശില്‍ ഉണ്ടായ അശാന്തിയെക്കുറിച്ചാണ് മുതിര്‍ന്ന കോണ്‍ഗ്രസ് നേതാവ് പരാമര്‍ശിച്ചത്. 

മുഖ്യ ഉപദേഷ്ടാവ് മുഹമ്മദ് യൂനുസിന്റെ നേതൃത്വത്തിലുള്ള ഇടക്കാല സര്‍ക്കാര്‍ അശാന്തി നിയന്ത്രണവിധേയമാക്കാന്‍ നടപടിയെടുക്കേണ്ടതുണ്ടെന്നും അത് അവരുടെ 'കടമ'യാണെന്നും വാര്‍ത്താ ഏജന്‍സിയായ എഎന്‍ഐയോട് സംസാരിച്ച തരൂര്‍ പറഞ്ഞു. 

'നിയമരാഹിത്യത്തിന്റെയും ഭീഷണിയുടെയും' അന്തരീക്ഷത്തില്‍ തിരഞ്ഞെടുപ്പ് നടത്താന്‍ കഴിയില്ലെന്ന് ബംഗ്ലാദേശില്‍ വോട്ടര്‍മാര്‍ക്ക് സുരക്ഷിതത്വം തോന്നുന്നില്ലെന്ന് ചൂണ്ടിക്കാട്ടി തരൂര്‍ പറഞ്ഞു. ബംഗ്ലാദേശില്‍ പാര്‍ലമെന്റ് തിരഞ്ഞെടുപ്പിനുള്ള വോട്ടെടുപ്പ് ഫെബ്രുവരി 12 ന് നടക്കും. 

'അതിര്‍ത്തിക്കപ്പുറത്ത് ഇത്തരമൊരു അസ്ഥിരമായ അന്തരീക്ഷം നിലനില്‍ക്കുമ്പോള്‍, ഇന്ത്യയിലും ചില ഗ്രൂപ്പുകള്‍ പ്രതികരണമായി പ്രതിഷേധങ്ങള്‍ സംഘടിപ്പിച്ചതില്‍ അതിശയിക്കാനില്ല. നമ്മുടെ ജനാധിപത്യത്തില്‍ അവര്‍ക്ക് അങ്ങനെ ചെയ്യാന്‍ അവകാശമുണ്ട്. ഈ പ്രതിഷേധങ്ങള്‍ കൈവിട്ടുപോകുന്നതായി ആര്‍ക്കും തോന്നിയിട്ടില്ല,' അദ്ദേഹം പറഞ്ഞു.

'ഒരു അക്രമവും ഉണ്ടായിട്ടില്ല, ആള്‍ക്കൂട്ടക്കൊലയും ഉണ്ടായിട്ടില്ല, തീര്‍ച്ചയായും ഏതൊരു അക്രമ ശ്രമവും നമ്മുടെ പോലീസ് തടയുകയും വേണം. ബംഗ്ലാദേശികളും ഇതേ കാര്യം ചെയ്യണമെന്നാണ് ഞങ്ങള്‍ ആഗ്രഹിക്കുന്നത്,' അദ്ദേഹം കൂട്ടിച്ചേര്‍ത്തു.