ബഹിരാകാശത്ത് നിങ്ങൾ എങ്ങനെ ഉറങ്ങും, എന്ത് കഴിക്കും, അസുഖം വന്നാൽ എന്ത് ചെയ്യും? ബഹിരാകാശ നിലയത്തിൽ നിന്ന് വിദ്യാർത്ഥികളുടെ ചോദ്യങ്ങൾക്ക് ഉത്തരം നൽകി ശുഭാൻഷു ശുക്ല

ഡല്‍ഹി: അന്താരാഷ്ട്ര ബഹിരാകാശ നിലയത്തില്‍ നിന്ന് ശുഭാന്‍ഷു ശുക്ല വിവിധ സ്‌കൂളുകളിലെ വിദ്യാര്‍ത്ഥികളുമായി സംവദിച്ചു. ബഹിരാകാശ നിലയത്തിലെത്തിയ ശുഭാന്‍ഷു അവിടെയുള്ള അനുഭവങ്ങള്‍ കുട്ടികളുമായി പങ്കുവെച്ചു.

ബഹിരാകാശത്തില്‍ ഉറക്കം എങ്ങനെയാണ്?

ബഹിരാകാശത്തില്‍ തറയോ സീലിംഗോ ഇല്ലാത്തതിനാല്‍, സ്ലീപ്പിംഗ് ബാഗുകള്‍ ചുവരുകളിലോ സീലിംഗിലോ കെട്ടിയിടുകയാണ് ബഹിരാകാശയാത്രികര്‍ ചെയ്യുന്നത്. ഒരേ സ്ഥലത്ത് തുടര്‍ന്നുറങ്ങാന്‍ ബാഗ് കെട്ടിയിടേണ്ടതുണ്ട്; അല്ലെങ്കില്‍ അവര്‍ പൊങ്ങിക്കിടക്കും. ''ചുവരിലും സീലിംഗിലും ഉറങ്ങുന്നവരെ കാണാം,'' എന്നാണ് ശുക്ലയുടെ വിശദീകരണം.

അസുഖം വന്നാല്‍ എന്ത് ചെയ്യും?

ബഹിരാകാശ നിലയത്തില്‍ അസുഖം അനുഭവപ്പെട്ടാല്‍, അവര്‍ക്കായി ആവശ്യമായ മരുന്നുകള്‍ സ്റ്റേഷനില്‍ തന്നെ സൂക്ഷിച്ചിരിക്കുന്നു. അതിനാല്‍ അടിയന്തരമായി ചികിത്സ നല്‍കാന്‍ സാധിക്കും.

ഭക്ഷണം എങ്ങനെയാണ്?

ബഹിരാകാശയാത്രികര്‍ക്ക് മുന്‍കൂട്ടി പായ്ക്ക് ചെയ്ത ഭക്ഷണങ്ങളാണ് നല്‍കുന്നത്. പോഷകാഹാരം ഉറപ്പാക്കാന്‍ പ്രത്യേകം ശ്രദ്ധിക്കുന്നു. ചിലപ്പോള്‍ ഭൂമിയില്‍ നിന്ന് മധുരപലഹാരങ്ങളും ബഹിരാകാശത്തേക്ക് കൊണ്ടുപോകാറുണ്ട്.

വിനോദത്തിനായി സമയം വളരെ കുറവാണ്, പക്ഷേ അവര്‍ ചിലപ്പോള്‍ കളിക്കാനും സമയം കണ്ടെത്തുന്നു. ബഹിരാകാശ സഞ്ചാരികള്‍ക്ക് ഏറ്റവും ആസ്വാദ്യകരമായ അനുഭവം, സ്റ്റേഷനില്‍ നിന്ന് പുറത്തു നോക്കി ഭൂമിയുടെ മനോഹരമായ കാഴ്ച കാണുന്നതാണ്.

ബഹിരാകാശത്തില്‍ ശരീരം സൂക്ഷ്മ ഗുരുത്വാകര്‍ഷണവുമായി പൊരുത്തപ്പെടുന്നു. ഭൂമിയിലേക്ക് മടങ്ങുമ്പോള്‍ വീണ്ടും പൊരുത്തപ്പെടുത്തല്‍ വേണം, അതൊരു വെല്ലുവിളിയാണ്.

വ്യായാമത്തിനായി സീറ്റ് ഇല്ലാത്ത സൈക്കിള്‍ പോലുള്ള ഉപകരണങ്ങള്‍ ഉപയോഗിക്കുന്നു. പെഡലുകള്‍ ലോക്ക് ചെയ്ത്, ബെല്‍റ്റ് ഉപയോഗിച്ച് ശരീരം കെട്ടി വ്യായാമം ചെയ്യണം.

ബഹിരാകാശയാത്രികര്‍ക്ക് കുടുംബാംഗങ്ങളുമായി ബന്ധപ്പെടാന്‍ സൗകര്യമുണ്ട്, അതിനാല്‍ ഏകാന്തത അനുഭവപ്പെടുന്നില്ല. ഇങ്ങനെ, ബഹിരാകാശത്തെ സംബന്ധിച്ച വിദ്യാര്‍ത്ഥികളുടെ എല്ലാ ചോദ്യങ്ങള്‍ക്കും ശുഭാന്‍ഷു ശുക്ല ഉത്തരം നല്‍കി.