ശുഭാൻഷു ശുക്ലയുടെ ബഹിരാകാശ ദൗത്യത്തെക്കുറിച്ചുള്ള പ്രത്യേക ചർച്ച ഇന്ന് ലോക്‌സഭയിൽ, പ്രധാനമന്ത്രി മോദി അദ്ദേഹത്തെ കാണും

ഡല്‍ഹി: ബഹിരാകാശയാത്രികന്‍ ശുഭാന്‍ഷു ശുക്ല ഞായറാഴ്ച പുലര്‍ച്ചെ ഇന്ത്യയിലേക്ക് മടങ്ങി. അന്താരാഷ്ട്ര ബഹിരാകാശ നിലയത്തിലേക്കുള്ള (ഐ.എസ്.എസ്) ചരിത്രപരമായ യാത്രയെ ആഘോഷിക്കാന്‍ ഡല്‍ഹി വിമാനത്താവളത്തില്‍ ത്രിവര്‍ണ്ണ പതാക വീശിയും ഡ്രം മുഴക്കിയും നിരവധി പേര്‍ തടിച്ചുകൂടി. 

കേന്ദ്രമന്ത്രി ജിതേന്ദ്ര സിംഗ്, ഡല്‍ഹി മുഖ്യമന്ത്രി രേഖ ഗുപ്ത, ഐ.എസ്.ആര്‍.ഒ ചെയര്‍മാന്‍ വി. നാരായണന്‍ എന്നിവര്‍ ശുഭാന്‍ഷു ശുക്ലയെയും അദ്ദേഹത്തിന്റെ സഹ ബഹിരാകാശയാത്രികന്‍ പ്രശാന്ത് ബാലകൃഷ്ണന്‍ നായരെയും സ്വാഗതം ചെയ്തു.

അദ്ദേഹത്തിന്റെ തിരിച്ചുവരവ് ആഘോഷിക്കുന്നതിനായി തിങ്കളാഴ്ച ലോക്സഭയില്‍ പ്രത്യേക ചര്‍ച്ച സംഘടിപ്പിക്കും. ബഹിരാകാശ യാത്രയ്ക്കും ഐഎസ്എസിനുമുള്ള യുഎസിലെ ഒരു വര്‍ഷത്തെ പരിശീലനത്തിനും ശേഷം നാട്ടിലേക്ക് മടങ്ങിയ ശുക്ലയെ സ്വീകരിക്കാന്‍ ഭാര്യ കാംനയും മകന്‍ കിയാഷും വിമാനത്താവളത്തില്‍ ഉണ്ടായിരുന്നു.

'നന്ദി സര്‍. വീട്ടിലേക്ക് തിരിച്ചെത്തിയതില്‍ വളരെ സന്തോഷം തോന്നുന്നു,' വിമാനത്താവളത്തില്‍ സ്വീകരിച്ച ശേഷം ജിതേന്ദ്ര സിംഗ് പോസ്റ്റ് ചെയ്ത സ്വാഗത സന്ദേശത്തിന് മറുപടിയായി ശുക്ല ഇന്‍സ്റ്റാഗ്രാമില്‍ എഴുതി. തിങ്കളാഴ്ച ശുഭാന്‍ഷു പ്രധാനമന്ത്രി നരേന്ദ്ര മോദിയെ കാണുകയും തുടര്‍ന്ന് ജന്മനാടായ ലഖ്നൗവിലേക്ക് പോകുകയും ചെയ്യുമെന്ന് പ്രതീക്ഷിക്കുന്നു.

ഓഗസ്റ്റ് 22-23 തീയതികളില്‍ നടക്കുന്ന ദേശീയ ബഹിരാകാശ ദിനാഘോഷങ്ങളില്‍ പങ്കെടുക്കാന്‍ അദ്ദേഹം തലസ്ഥാനത്തേക്ക് മടങ്ങാനും സാധ്യതയുണ്ട്.

ശുക്ലയുടെ തിരിച്ചുവരവിനെ അനുസ്മരിച്ച്, 'അന്താരാഷ്ട്ര ബഹിരാകാശ നിലയത്തിലെ ഇന്ത്യയുടെ ആദ്യത്തെ ബഹിരാകാശയാത്രികന്‍ - 2047 ഓടെ വികസിത ഇന്ത്യയ്ക്ക് ബഹിരാകാശ പദ്ധതിയുടെ പ്രധാന പങ്ക്' എന്ന വിഷയത്തില്‍ തിങ്കളാഴ്ച ലോക്സഭയില്‍ പ്രത്യേക ചര്‍ച്ച നടക്കും. ലോക്സഭാ സെക്രട്ടേറിയറ്റ് പുറത്തിറക്കിയ അജണ്ടയിലാണ് ഈ വിവരങ്ങള്‍ നല്‍കിയിരിക്കുന്നത്.

ഈ ചരിത്രപരമായ ചര്‍ച്ചയ്ക്കൊപ്പം, രണ്ട് പ്രധാന ബില്ലുകളും ലോക്സഭയില്‍ അവതരിപ്പിക്കും. ജന്‍ വിശ്വാസ് (ഭേദഗതി) ബില്‍, 2025 അവതരിപ്പിക്കാനുള്ള അനുമതിക്കായി കേന്ദ്രമന്ത്രി പീയൂഷ് ഗോയല്‍ ഒരു പ്രമേയം അവതരിപ്പിക്കും. 

രണ്ടാമത്തെ ബില്‍ ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് മാനേജ്മെന്റ് (ഭേദഗതി) ബില്‍, 2025 ആണ്. കേന്ദ്രമന്ത്രി ധര്‍മ്മേന്ദ്ര പ്രധാന്‍ ഇത് അവതരിപ്പിക്കും. ഈ ബില്ലിലൂടെ, 2017 ലെ ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് മാനേജ്മെന്റ് ആക്ടില്‍ കൂടുതല്‍ ഭേദഗതികള്‍ വരുത്താന്‍ നിര്‍ദ്ദേശിച്ചിട്ടുണ്ട്.