സാമൂഹിക മാറ്റത്തെ എതിർക്കുന്നവരുമായോ 'സനാതനി'കളുമായോ അല്ല, സമൂഹത്തിനുവേണ്ടി നിലകൊള്ളുന്നവരുമായി സഹവസിക്കുക. സിദ്ധരാമയ്യ

ഡല്‍ഹി: 'സനാതനികളുടെ' കൂട്ടുകെട്ട് ഒഴിവാക്കണമെന്നും ആര്‍എസ്എസിനെയും സംഘപരിവാറിനെയും കുറിച്ച് ജാഗ്രത പാലിക്കണമെന്നും കര്‍ണാടക മുഖ്യമന്ത്രി സിദ്ധരാമയ്യ ശനിയാഴ്ച ജനങ്ങളോട് അഭ്യര്‍ത്ഥിച്ചു.

ബിആര്‍ അംബേദ്കറിനെയും അദ്ദേഹം രൂപപ്പെടുത്തിയ ഭരണഘടനയെയും അവര്‍ ചരിത്രപരമായി എതിര്‍ത്തിരുന്നുവെന്ന് അദ്ദേഹം പറഞ്ഞു.

'നിങ്ങളുടെ കൂട്ടുകെട്ട് ശരിയായി നിലനിര്‍ത്തുക. സാമൂഹിക മാറ്റത്തെ എതിര്‍ക്കുന്നവരുമായോ 'സനാതനി'കളുമായോ അല്ല, സമൂഹത്തിനുവേണ്ടി നിലകൊള്ളുന്നവരുമായി സഹവസിക്കുക,' മൈസൂര്‍ സര്‍വകലാശാലയുടെ രജത ജൂബിലി ആഘോഷങ്ങള്‍ ഉദ്ഘാടനം ചെയ്ത് പുതിയ ജ്ഞാന ദര്‍ശന കെട്ടിടം സമര്‍പ്പിച്ച ശേഷം സിദ്ധരാമയ്യ പറഞ്ഞു.

'ചീഫ് ജസ്റ്റിസിന് നേരെ ഒരു 'സനാതനി' ചെരുപ്പ് എറിഞ്ഞ സംഭവം സൂചിപ്പിക്കുന്നത് സമൂഹത്തില്‍ ഇപ്പോഴും 'സനാതനികളും' യാഥാസ്ഥിതികരും നിലനില്‍ക്കുന്നുണ്ടെന്നാണ്.

ഈ പ്രവൃത്തിയെ ദലിതര്‍ മാത്രമല്ല, എല്ലാവരും അപലപിക്കണം. അപ്പോള്‍ മാത്രമേ സമൂഹം മാറ്റത്തിന്റെ പാതയിലേക്ക് നീങ്ങുന്നുവെന്ന് നമുക്ക് പറയാന്‍ കഴിയൂ' എന്ന് മുഖ്യമന്ത്രി പറഞ്ഞു. 

ആര്‍എസ്എസും സംഘപരിവാറും അംബേദ്കറുടെ ഭരണഘടനയെ എതിര്‍ത്തിരുന്നുവെന്നും അത് തുടരുകയാണെന്നും സിദ്ധരാമയ്യ ആരോപിച്ചു. ജനങ്ങള്‍ ജാഗ്രത പാലിക്കണമെന്ന് അദ്ദേഹം ആഹ്വാനം ചെയ്തു.