സിക്കിമിൽ മണ്ണിടിച്ചിൽ നാശം വിതച്ചു, നാല് പേർ മരിച്ചു, മൂന്ന് പേരെ കാണാതായി

ഡല്‍ഹി: പശ്ചിമ സിക്കിമിലെ യാങ്താങ് മണ്ഡലത്തിലെ അപ്പര്‍ റിമ്പിയില്‍ തിങ്കളാഴ്ച അര്‍ദ്ധരാത്രി മണ്ണിടിച്ചില്‍ ഉണ്ടായതായി വിവരം.

അര്‍ദ്ധരാത്രിയിലുണ്ടായ മണ്ണിടിച്ചിലില്‍ കുറഞ്ഞത് നാല് പേര്‍ മരിച്ചു. അതേസമയം, അപകടത്തില്‍ മൂന്ന് പേരെ കാണാതായതായും റിപ്പോര്‍ട്ടുണ്ട്. ഈ സംഭവത്തിന്റെ വീഡിയോയും പുറത്തുവന്നിട്ടുണ്ട്. മണ്ണിടിച്ചിലില്‍ മൂന്ന് പേര്‍ സംഭവസ്ഥലത്ത് തന്നെ മരിച്ചു.

വെള്ളപ്പൊക്കമുണ്ടായ ഹ്യൂം നദിക്ക് കുറുകെ മരക്കഷണങ്ങള്‍ കൊണ്ട് താല്‍ക്കാലിക പാലം നിര്‍മ്മിച്ച്, പ്രദേശവാസികളുമായും എസ്എസ്ബി ജവാന്മാരുമായും സഹകരിച്ച് പോലീസ് സംഘം പരിക്കേറ്റ രണ്ട് സ്ത്രീകളെ രക്ഷപ്പെടുത്തി.

പരിക്കേറ്റവരെ ഉടന്‍ തന്നെ ആശുപത്രിയില്‍ എത്തിച്ചതായി എസ്പി ഗെജിംഗ് ഷെറിംഗ് ഷെര്‍പ പറഞ്ഞു. ആശുപത്രിയില്‍ ചികിത്സയ്ക്കിടെ ഒരു സ്ത്രീ മരിച്ചു. മറ്റൊരു സ്ത്രീയുടെ നില ഗുരുതരമായി തുടരുന്നു, മൂന്ന് പേരെ ഇപ്പോഴും കാണാനില്ല.