അസം സൈനിക താവളത്തിൽ തീവ്രവാദികളുടെ വെടിവെപ്പിൽ മൂന്ന് സൈനികർക്ക് പരിക്ക്, സൈന്യം തിരിച്ചടിച്ചു

ഡല്‍ഹി: കിഴക്കന്‍ അസമിലെ ടിന്‍സുകിയ ജില്ലയിലെ ഒരു സൈനിക താവളത്തിന് നേരെ അര്‍ദ്ധരാത്രിക്ക് ശേഷം നടന്ന ആക്രമണത്തില്‍ മൂന്ന് സൈനികര്‍ക്ക് പരിക്കേറ്റു.

കക്കോപത്തര്‍ കമ്പനിക്ക് നേരെ ഓടുന്ന വാഹനത്തില്‍ നിന്ന് തീവ്രവാദികള്‍ വെടിയുതിര്‍ത്തതായി സൈന്യം അറിയിച്ചു. ഡ്യൂട്ടിയിലായിരുന്ന സൈനികര്‍ ഉടനടി ഫലപ്രദമായി പ്രതികരിച്ചുവെന്നും പ്രദേശത്തെ സാധാരണക്കാരുടെ വീടുകള്‍ക്ക് നാശനഷ്ടങ്ങള്‍ ഉണ്ടാകാതിരിക്കാന്‍ ജാഗ്രത പാലിച്ചുവെന്നും സൈന്യം പറഞ്ഞു.

ഉടനടിയുണ്ടായ തിരിച്ചടിയില്‍ ഭീകരര്‍ ആക്രമണം ഉപേക്ഷിച്ച് പലായനം ചെയ്തുവെന്നും അവരെ കണ്ടെത്താനും പിടികൂടാനുമുള്ള തിരച്ചില്‍ ആരംഭിച്ചിട്ടുണ്ടെന്നും സൈന്യം അറിയിച്ചു.

നിരോധിത ഭീകര സംഘടനയായ ഉള്‍ഫ (ഐ) അല്ലെങ്കില്‍ യുണൈറ്റഡ് ലിബറേഷന്‍ ഫ്രണ്ട് ഓഫ് അസം (ഇന്‍ഡിപെന്‍ഡന്റ്) എന്നിവയില്‍ നിന്നുള്ളവരാണ് ഭീകരരെന്ന് എന്‍ഡിടിവിയോട് വൃത്തങ്ങള്‍ പറഞ്ഞു, ഗ്രനേഡ് ലോഞ്ചറുകളും ഓട്ടോമാറ്റിക് റൈഫിളുകളും ഉപയോഗിച്ചാണ് ആക്രമണം നടത്തിയത്.

അസമിലെ ഈ പ്രദേശം തീവ്രവാദ പ്രവര്‍ത്തനങ്ങള്‍ കാരണം പലപ്പോഴും വാര്‍ത്താ തലക്കെട്ടുകളില്‍ ഇടം നേടിയിരുന്നു, എന്നാല്‍ കഴിഞ്ഞ കുറേ വര്‍ഷങ്ങളായി ഈ പ്രദേശം ശാന്തമാണ്.