ഖൊമേനിയുടെ വധം: മോദി സർക്കാരിന്റെ 'മൗനം' അംഗീകരിക്കാനാവില്ലെന്ന് സോണിയ ഗാന്ധി

ഡല്‍ഹി: ഇറാന്റെ പരമോന്നത നേതാവ് ആയത്തുള്ള അലി ഖൊമേനി കൊല്ലപ്പെട്ട സംഭവത്തില്‍ കേന്ദ്ര സര്‍ക്കാരിന്റെ മൗനത്തെ രൂക്ഷമായി വിമര്‍ശിച്ച് കോണ്‍ഗ്രസ് പാര്‍ലമെന്ററി പാര്‍ട്ടി അധ്യക്ഷ സോണിയ ഗാന്ധി.

സര്‍ക്കാരിന്റെ ഈ നിലപാട് നിഷ്പക്ഷതയല്ലെന്നും മറിച്ച് ഉത്തരവാദിത്തങ്ങളില്‍ നിന്നുള്ള പിന്മാറ്റമാണെന്നും അവര്‍ കുറ്റപ്പെടുത്തി. ഇത് ഇന്ത്യയുടെ വിദേശനയത്തിന്റെ വിശ്വാസ്യതയെ ചോദ്യം ചെയ്യുന്നതാണെന്നും അവര്‍ പറഞ്ഞു.

ഒരു പ്രമുഖ ദേശീയ ദിനപത്രത്തില്‍ എഴുതിയ ലേഖനത്തിലാണ് സോണിയ ഗാന്ധി തന്റെ നിലപാട് വ്യക്തമാക്കിയത്. ബജറ്റ് സമ്മേളനത്തിന്റെ രണ്ടാം ഭാഗത്തിനായി പാര്‍ലമെന്റ് വീണ്ടും ചേരുമ്പോള്‍, അന്താരാഷ്ട്ര മര്യാദകളുടെ ലംഘനത്തെക്കുറിച്ചുള്ള സര്‍ക്കാരിന്റെ ഈ 'അസ്വസ്ഥപ്പെടുത്തുന്ന മൗനം' പരസ്യമായി ചര്‍ച്ച ചെയ്യണമെന്ന് അവര്‍ ആവശ്യപ്പെട്ടു.

ചര്‍ച്ചകള്‍ നടന്നുകൊണ്ടിരിക്കെ ഒരു രാജ്യത്തിന്റെ ഭരണത്തലവനെ ലക്ഷ്യമിട്ട് വധിക്കുന്നത് അന്താരാഷ്ട്ര ബന്ധങ്ങളിലെ ഗുരുതരമായ വീഴ്ചയാണ്. യുഎന്നിന്റെ ചട്ടപ്രകാരം ഒരു രാജ്യത്തിന്റെ രാഷ്ട്രീയ സ്വാതന്ത്ര്യത്തിന്മേല്‍ കരുത്തുപയോഗിക്കുന്നത് നിരോധിച്ചിട്ടുള്ളതാണ്.

ഇറാന്റെ തിരിച്ചടിയെ അപലപിച്ച പ്രധാനമന്ത്രി, അതിന് കാരണമായ യുഎസ്-ഇസ്രായേല്‍ ആക്രമണത്തെക്കുറിച്ച് മൗനം പാലിച്ചു. ഇത് ഇസ്രായേലിനുള്ള പരോക്ഷമായ പിന്തുണയായാണ് കാണപ്പെടുന്നത്.

ഗ്ലോബല്‍ സൗത്തിലെ രാജ്യങ്ങളും ബ്രിക്‌സ് സഖ്യകക്ഷികളായ റഷ്യയും ചൈനയും ഈ വിഷയത്തില്‍ അകലം പാലിക്കുമ്പോള്‍, ഇന്ത്യയുടെ നിലപാട് വ്യക്തതയില്ലാത്തതാണ്.

2001-ല്‍ അടല്‍ ബിഹാരി വാജ്പേയി ടെഹ്റാന്‍ സന്ദര്‍ശിച്ചപ്പോള്‍ ഇറാനുമായുള്ള ഇന്ത്യയുടെ ആഴത്തിലുള്ള ബന്ധം ഊട്ടിയുറപ്പിച്ചിരുന്നു. ആ ചരിത്രപരമായ ബന്ധത്തിന് നിലവിലെ സര്‍ക്കാര്‍ ഒരു വിലയും നല്‍കുന്നില്ലെന്ന് സോണിയ ഗാന്ധി ആരോപിച്ചു.

ചരിത്രപരമായി ഇന്ത്യ ഉയര്‍ത്തിപ്പിടിച്ചിട്ടുള്ള സമാധാനം, പരമാധികാരം തുടങ്ങിയ തത്വങ്ങളില്‍ നിന്നുള്ള വ്യതിയാനമാണിതെന്ന് അവര്‍ ചൂണ്ടിക്കാട്ടി. ശനിയാഴ്ച പുലര്‍ച്ചെയാണ് ഇസ്രായേലും അമേരിക്കയും നടത്തിയ സംയുക്ത ആക്രമണത്തില്‍ ഖൊമേനി കൊല്ലപ്പെട്ടത്. ഈ വിഷയത്തില്‍ ഇന്ത്യ വ്യക്തമായ നിലപാട് സ്വീകരിക്കേണ്ട സമയം അതിക്രമിച്ചിരിക്കുകയാണെന്നും ജനാധിപത്യപരമായ ഉത്തരവാദിത്തം അതാണെന്നും സോണിയ ഗാന്ധി കൂട്ടിച്ചേര്‍ത്തു.