സ്പെക്ട്രം അനുവദിക്കുന്നതിനുള്ള ഏതൊരു സ്വകാര്യ ഇടപാടും രാജ്യത്തെ നിയമത്തിന്റെ ലംഘനമായിരിക്കും. സാറ്റലൈറ്റ് സ്പെക്ട്രം ഉപയോഗത്തിൽ ആധിപത്യം സ്ഥാപിക്കുന്നതിനായി എയർടെല്ലും സ്റ്റാർലിങ്കും ഒന്നിച്ച് ഒരു കാർട്ടൽ രൂപീകരിക്കുന്നത് ഇന്ത്യയിലെ ദശലക്ഷക്കണക്കിന് ടെലികോം വരിക്കാരുടെ നഷ്ടത്തിന് കാരണമാകും. മസ്‌കിന്റെ സ്റ്റാർലിങ്കുമായുള്ള എയർടെൽ,ജിയോ കരാറുകളെ വിമർശിച്ച് സിപിഐഎം

ഡല്‍ഹി: ഇന്ത്യയില്‍ അതിവേഗ സാറ്റലൈറ്റ് അധിഷ്ഠിത ഇന്റര്‍നെറ്റ് സേവനങ്ങള്‍ നല്‍കുന്നതിനായി ഇന്ത്യന്‍ ടെലികോം ഭീമന്മാരായ റിലയന്‍സ് ജിയോയും ഭാരതി എയര്‍ടെല്ലും ഇലോണ്‍ മസ്‌കിന്റെ സ്റ്റാര്‍ലിങ്കുമായി സഹകരിക്കുന്നതിനെതിരെ എതിര്‍പ്പ് പ്രകടിപ്പിച്ച് സിപിഐ(എം).

സ്പെക്ട്രം ഒരു അപൂര്‍വ ദേശീയ വിഭവമാണെന്ന് സിപിഐം എക്സില്‍ പങ്കിട്ട ഒരു പോസ്റ്റില്‍ കുറിച്ചു. തുറന്നതും സുതാര്യവുമായ ലേലത്തിലൂടെ മാത്രമേ സ്വകാര്യ കമ്പനികള്‍ക്ക് ഇത് അനുവദിക്കാന്‍ കഴിയൂ എന്ന് സിപിഎം 2 ജി കേസിലെ സുപ്രീം കോടതി വിധി പരാമര്‍ശിച്ച് ചൂണ്ടിക്കാണിച്ചു.

സ്‌പെക്ട്രം അനുവദിക്കുന്നതിനുള്ള ഏതൊരു സ്വകാര്യ ഇടപാടും രാജ്യത്തെ നിയമത്തിന്റെ ലംഘനമായിരിക്കും.

 സാറ്റലൈറ്റ് സ്‌പെക്ട്രം ഉപയോഗത്തില്‍ ആധിപത്യം സ്ഥാപിക്കുന്നതിനായി എയര്‍ടെല്ലും സ്റ്റാര്‍ലിങ്കും ഒന്നിച്ച് ഒരു കാര്‍ട്ടല്‍ രൂപീകരിക്കുന്നത് ഇന്ത്യയിലെ ദശലക്ഷക്കണക്കിന് ടെലികോം വരിക്കാരുടെ നഷ്ടത്തിന് കാരണമാകുമെന്നും സിപിഎം പറഞ്ഞു.

നിയമപരമായ ആശങ്കകള്‍ക്കപ്പുറം, ദേശീയ സുരക്ഷാ അപകടസാധ്യതകള്‍ക്കും പാര്‍ട്ടി ഊന്നല്‍ നല്‍കി. പ്രതിരോധം, ഐഎസ്ആര്‍ഒ പ്രവര്‍ത്തനങ്ങള്‍ പോലുള്ള തന്ത്രപരമായ ഉപയോഗങ്ങള്‍ക്ക് മാത്രമായി ഉപഗ്രഹ സ്‌പെക്ട്രം അനുവദിക്കണമെന്നും പാര്‍ട്ടി ആവശ്യപ്പെട്ടു.