ഇന്ത്യയും ഫ്രാൻസും ഒരുമിച്ച് തദ്ദേശീയമായി നിർമ്മിച്ച സ്റ്റെൽത്ത് യുദ്ധവിമാനങ്ങൾക്കുള്ള എഞ്ചിനുകൾ നിർമ്മിക്കും

ഡല്‍ഹി: തദ്ദേശീയ അഞ്ചാം തലമുറ സ്റ്റെല്‍ത്ത് ജെറ്റ് എഞ്ചിന്‍ നിര്‍മ്മിക്കാനുള്ള പദ്ധതിയില്‍ ഇന്ത്യ ഫ്രാന്‍സുമായി ചേര്‍ന്ന് പ്രവര്‍ത്തിക്കുന്നു. ഇന്ത്യന്‍ സര്‍ക്കാരിന്റെ ഈ നടപടിക്കുശേഷം, ഇരു രാജ്യങ്ങളും തമ്മിലുള്ള തന്ത്രപരമായ പങ്കാളിത്തം ശക്തിപ്പെടാന്‍ സാധ്യതയുണ്ട്.

സമീപഭാവിയില്‍ തന്നെ, ഡിആര്‍ഡിഒ ഈ പദ്ധതി സുരക്ഷാ കാര്യങ്ങള്‍ക്കായുള്ള കാബിനറ്റ് കമ്മിറ്റിയുടെ അംഗീകാരത്തിനായി അയയ്ക്കും.

ഇരു രാജ്യങ്ങളും സംയുക്തമായി ഇന്ത്യയില്‍ 120 കെഎല്‍ ത്രസ്റ്റുള്ള എഞ്ചിനുകള്‍ നിര്‍മ്മിക്കുമെന്ന് പറയപ്പെടുന്നു. സഫ്രാന്‍ കമ്പനിയുടെ നിര്‍ദ്ദേശവും ഡിആര്‍ഡിഒ അംഗീകരിച്ചിട്ടുണ്ട്. ഈ കമ്പനി ഇതിനുമുമ്പും ഇന്ത്യയില്‍ ഹെലികോപ്റ്ററുകള്‍ നിര്‍മ്മിച്ചിട്ടുണ്ട്.

അതേസമയം, അഞ്ചാം തലമുറ യുദ്ധവിമാനമായ എഎംസിഎയ്ക്ക് സഫ്രാന്‍ കമ്പനി നല്ലൊരു ഓപ്ഷനാണെന്ന് ഡിആര്‍ഡിഒ പറയുന്നു.

ഏകദേശം 7 ബില്യണ്‍ ഡോളര്‍ ചെലവ് വരുന്ന ഈ പദ്ധതിയില്‍ ഡിആര്‍ഡിഒയുടെ ലാബ് ഗ്യാസ് ടര്‍ബൈന്‍ ഗവേഷണവും ഉള്‍പ്പെടുത്തും.

പ്രതിരോധ മന്ത്രി രാജ്നാഥ് സിംഗ് ഈ പദ്ധതിക്ക് അംഗീകാരം നല്‍കിയിരുന്നു. ഇന്ത്യ തദ്ദേശീയമായി അഞ്ചാം തലമുറ യുദ്ധവിമാനങ്ങള്‍ നിര്‍മ്മിക്കേണ്ടത് അത്യാവശ്യമാണെന്ന് പ്രതിരോധ മന്ത്രി പറഞ്ഞു. യുദ്ധവിമാനങ്ങളുടെ നിര്‍മ്മാണത്തില്‍ ഇന്ത്യ അഭൂതപൂര്‍വമായ ഒരു ചുവടുവയ്പ്പ് നടത്തിയിട്ടുണ്ടെന്ന് അദ്ദേഹം പറഞ്ഞു.