മധ്യേഷ്യൻ യുദ്ധം ആഞ്ഞടിച്ചു: ഓഹരി വിപണിയിൽ വൻ തകർച്ച; സെൻസെക്സ് 2,743 പോയിന്റ് ഇടിഞ്ഞു

മുംബൈ: മധ്യേഷ്യയില്‍ യുദ്ധം രൂക്ഷമായതിനെത്തുടര്‍ന്ന് ആഗോള വിപണിയിലുണ്ടായ അനിശ്ചിതത്വം ഇന്ത്യന്‍ ഓഹരി വിപണിയെ തകര്‍ത്തെറിഞ്ഞു.

തിങ്കളാഴ്ച വ്യാപാരം ആരംഭിച്ചയുടന്‍ സെന്‍സെക്‌സും നിഫ്റ്റിയും കുത്തനെ ഇടിഞ്ഞു. എണ്ണയുടെ വിലയിലുണ്ടായ വര്‍ധനവും വിദേശ നിക്ഷേപകരുടെ പിന്മാറ്റവുമാണ് വിപണിക്ക് തിരിച്ചടിയായത്.

വ്യാപാരത്തിന്റെ ആദ്യ മണിക്കൂറുകളില്‍ ബി.എസ്.ഇ സെന്‍സെക്‌സ് 2,743.46 പോയിന്റ് (3.37%) ഇടിഞ്ഞ് 78,543.73 എന്ന നിലയിലെത്തി. എന്‍.എസ്.ഇ നിഫ്റ്റി 533.55 പോയിന്റ് (2.11%) തകര്‍ന്ന് 24,645.10 ലേക്ക് താഴ്ന്നു.

റിലയന്‍സ് ഇന്‍ഡസ്ട്രീസ്, അദാനി പോര്‍ട്‌സ്, ലാര്‍സന്‍ ആന്‍ഡ് ടൂബ്രോ, ഏഷ്യന്‍ പെയിന്റ്‌സ്, അള്‍ട്രാടെക് സിമന്റ്, ഇന്റര്‍ഗ്ലോബ് ഏവിയേഷന്‍ തുടങ്ങിയ മുന്‍നിര ഓഹരികളെല്ലാം വലിയ നഷ്ടം നേരിട്ടു. ഭാരത് ഇലക്ട്രോണിക്‌സ് മാത്രമാണ് നേട്ടമുണ്ടാക്കിയ ഏക ഓഹരി.

ഇറാന്റെ പരമോന്നത നേതാവ് ആയത്തുള്ള അലി ഖമേനി കൊല്ലപ്പെട്ടതിന് പിന്നാലെ മേഖലയിലെ സംഘര്‍ഷം രൂക്ഷമായത് ഇന്ധന വിതരണത്തെ ബാധിക്കുമെന്ന ആശങ്ക വര്‍ധിപ്പിച്ചു. ബ്രെന്റ് ക്രൂഡ് വില ബാരലിന് 76.79 ഡോളറിലേക്ക് ഉയര്‍ന്നു.

'മധ്യേഷ്യയിലെ യുദ്ധം വിപണിയില്‍ വലിയ നിഴല്‍ വീഴ്ത്തിയിരിക്കുകയാണ്. ഇന്ധന വിലയിലുണ്ടാകുന്ന വര്‍ധനവാണ് വിപണി നേരിടുന്ന ഏറ്റവും വലിയ വെല്ലുവിളി,' എന്ന് ജിയോജിത് ഇന്‍വെസ്റ്റ്മെന്റ് സ്ട്രാറ്റജിസ്റ്റ് വി.കെ. വിജയകുമാര്‍ നിരീക്ഷിച്ചു.

ജപ്പാനിലെ നിക്കി, ഹോങ്കോങ്ങിലെ ഹാങ് സെങ് തുടങ്ങിയ ഏഷ്യന്‍ വിപണികളും നഷ്ടത്തിലാണ് വ്യാപാരം തുടരുന്നത്. കഴിഞ്ഞ വെള്ളിയാഴ്ച അമേരിക്കന്‍ വിപണിയും ഇടിവോടെയാണ് വ്യാപാരം അവസാനിപ്പിച്ചത്.

യുദ്ധം ദീര്‍ഘകാലം നീണ്ടുനില്‍ക്കുകയാണെങ്കില്‍ ആഗോള വ്യാപാര പാതകളെയും വിതരണ ശൃംഖലയെയും ബാധിക്കുമെന്നും ഇത് പണപ്പെരുപ്പം വര്‍ധിക്കാന്‍ കാരണമാകുമെന്നും സാമ്പത്തിക വിദഗ്ധര്‍ മുന്നറിയിപ്പ് നല്‍കുന്നു.