തെലങ്കാനയിൽ തെരുവ് നായ്ക്കൾക്ക് നേരെയുള്ള ക്രൂരത തുടരുന്നു; യാചാരത്തിൽ 100 നായ്ക്കളെ വിഷം കൊടുത്തു കൊന്നു

ഹൈദരാബാദ്: തെലങ്കാനയിലെ രംഗറെഡ്ഡി ജില്ലയിലുള്ള യാചാരം ഗ്രാമത്തില്‍ നൂറോളം തെരുവ് നായ്ക്കളെ വിഷം കൊടുത്തു കൊലപ്പെടുത്തി.

ഹൈദരാബാദിന് സമീപമുള്ള ഈ ഗ്രാമത്തില്‍ നടന്ന ക്രൂരതയെത്തുടര്‍ന്ന് സമാന്തര അന്വേഷണം ആരംഭിച്ച പോലീസ്, ഗ്രാമ സര്‍പഞ്ച്, പഞ്ചായത്ത് സെക്രട്ടറി, വാര്‍ഡ് മെമ്പര്‍ എന്നിവര്‍ക്കെതിരെ കേസെടുത്തു. കഴിഞ്ഞ രണ്ടാഴ്ചയ്ക്കുള്ളില്‍ സംസ്ഥാനത്തിന്റെ വിവിധ ഭാഗങ്ങളിലായി 500-ലധികം തെരുവ് നായ്ക്കള്‍ കൊല്ലപ്പെട്ടതിന് പിന്നാലെയാണ് ഈ പുതിയ സംഭവം.

'സ്ട്രേ അനിമല്‍ ഫൗണ്ടേഷന്‍ ഓഫ് ഇന്ത്യ'  നല്‍കിയ പരാതിയെത്തുടര്‍ന്നാണ് സംഭവം പുറംലോകമറിഞ്ഞത്. ജനുവരി 19-ന് നായ്ക്കള്‍ക്ക് മാരകമായ വിഷം കുത്തിവെച്ച് കൊലപ്പെടുത്തുകയായിരുന്നുവെന്ന് മൃഗസ്നേഹികള്‍ ആരോപിക്കുന്നു.

പ്രാഥമിക അന്വേഷണത്തില്‍ 50 ഓളം നായ്ക്കളുടെ മൃതദേഹം കണ്ടെത്തിയെങ്കിലും കൊല്ലപ്പെട്ട നായ്ക്കളുടെ എണ്ണം നൂറിലധികം വരുമെന്നാണ് സൂചന. ഇവയുടെ മൃതദേഹങ്ങള്‍ ഗ്രാമത്തിന് പുറത്ത് കുഴിച്ചുമൂടിയ നിലയിലാണ്.

തിരഞ്ഞെടുപ്പ് വാഗ്ദാനം പാലിക്കാന്‍ കൊലപാതകം?

ഡിസംബറില്‍ നടന്ന ഗ്രാമപഞ്ചായത്ത് തിരഞ്ഞെടുപ്പിന് മുന്നോടിയായി പല സ്ഥാനാര്‍ത്ഥികളും തെരുവ് നായ്ക്കളുടെ ശല്യം അവസാനിപ്പിക്കുമെന്ന് വോട്ടര്‍മാര്‍ക്ക് വാഗ്ദാനം നല്‍കിയിരുന്നു. ഈ വാഗ്ദാനം പാലിക്കുന്നതിനായി പ്രൊഫഷണല്‍ 'ഡോഗ് കില്ലര്‍മാരെ' വാടകയ്ക്കെടുത്താണ് ഇത്തരം കൂട്ടക്കൊലകള്‍ നടത്തുന്നതെന്ന് പോലീസ് സംശയിക്കുന്നു.

ഹനംകൊണ്ടയില്‍ മാത്രം 300-ഓളം നായ്ക്കള്‍ കൊല്ലപ്പെട്ടു. രണ്ട് വനിതാ സഭാംഗങ്ങള്‍ ഉള്‍പ്പെടെ ഒന്‍പത് പേര്‍ക്കെതിരെ കേസെടുത്തു. കാമറെഡ്ഡിയില്‍ ഏകദേശം 200 നായ്ക്കളെയാണ് ഇവിടെ സമാനമായ രീതിയില്‍ കൊലപ്പെടുത്തിയത്.

ഭാരതീയ ന്യായ സംഹിത  മൃഗങ്ങളോടുള്ള ക്രൂരത തടയല്‍ നിയമം എന്നിവ പ്രകാരമാണ് പ്രതികള്‍ക്കെതിരെ കേസെടുത്തിരിക്കുന്നത്.

തെരുവ് നായ്ക്കളുടെ ആക്രമണം തടയാന്‍ വന്ധ്യംകരണം പോലുള്ള മാര്‍ഗ്ഗങ്ങള്‍ സ്വീകരിക്കുന്നതിന് പകരം നിയമവിരുദ്ധമായി അവയെ കൊന്നൊടുക്കുന്നത് അംഗീകരിക്കാനാവില്ലെന്ന് മൃഗസംരക്ഷണ പ്രവര്‍ത്തകര്‍ ചൂണ്ടിക്കാട്ടുന്നു.

ഈ സംഭവത്തില്‍ കുറ്റക്കാര്‍ക്കെതിരെ കര്‍ശന നടപടി സ്വീകരിക്കണമെന്നാവശ്യപ്പെട്ട് ഹൈദരാബാദില്‍ വ്യാപക പ്രതിഷേധം നടക്കുകയാണ്.