എന്റെ ജീവിതം ജനാധിപത്യ പാരമ്പര്യങ്ങളില്‍ വേരൂന്നിയതാണ്. ഇന്ത്യയുടെ യഥാര്‍ത്ഥ ശക്തി ഓരോ വ്യക്തിയുടെയും അന്തസ്സിലാണ്. അഗാധമായ വിനയത്തോടും ഭരണഘടനയില്‍ പ്രതിപാദിച്ചിരിക്കുന്ന മൂല്യങ്ങളോടുള്ള അചഞ്ചലമായ പ്രതിബദ്ധതയോടും കൂടിയാണ് താന്‍ പത്രിക സമര്‍പ്പിച്ചതെന്ന് ബി. സുദര്‍ശന്‍ റെഡ്ഡി

ഡല്‍ഹി: ഇന്ത്യാ സഖ്യം വൈസ് പ്രസിഡന്റ് സ്ഥാനത്തേക്ക് ബി സുദര്‍ശന്‍ റെഡ്ഡിയെ നാമനിര്‍ദ്ദേശം ചെയ്തു. ബി സുദര്‍ശന്‍ റെഡ്ഡി വ്യാഴാഴ്ച നാമനിര്‍ദ്ദേശ പത്രിക സമര്‍പ്പിച്ചു.

ഉപരാഷ്ട്രപതി തിരഞ്ഞെടുപ്പിന് നാമനിര്‍ദ്ദേശ പത്രിക സമര്‍പ്പിക്കാനുള്ള അവസാന ദിവസം ഇന്നാണ്. എന്‍ഡിഎയില്‍ നിന്നുള്ള സിപി രാധാകൃഷ്ണന്‍ ബുധനാഴ്ച നാമനിര്‍ദ്ദേശ പത്രിക സമര്‍പ്പിച്ചിരുന്നു.

ബി സുദര്‍ശന്‍ റെഡ്ഡിയുടെ നാമനിര്‍ദ്ദേശ വേളയില്‍ കോണ്‍ഗ്രസ് എംപി രാഹുല്‍ ഗാന്ധി, കോണ്‍ഗ്രസ് ദേശീയ പ്രസിഡന്റ് മല്ലികാര്‍ജുന്‍ ഖാര്‍ഗെ എന്നിവരുള്‍പ്പെടെ നിരവധി പ്രതിപക്ഷ നേതാക്കള്‍ അദ്ദേഹത്തോടൊപ്പം ഉണ്ടായിരുന്നു.

അഗാധമായ വിനയത്തോടും ഭരണഘടനയില്‍ പ്രതിപാദിച്ചിരിക്കുന്ന മൂല്യങ്ങളോടുള്ള അചഞ്ചലമായ പ്രതിബദ്ധതയോടും കൂടിയാണ് താന്‍ പത്രിക സമര്‍പ്പിച്ചതെന്ന് പ്രതിപക്ഷ ഉപരാഷ്ട്രപതി സ്ഥാനാര്‍ത്ഥി ബി. സുദര്‍ശന്‍ റെഡ്ഡി നാമനിര്‍ദ്ദേശ പത്രിക സമര്‍പ്പിച്ച ശേഷം പറഞ്ഞു.

എന്റെ ജീവിതം ജനാധിപത്യ പാരമ്പര്യങ്ങളില്‍ വേരൂന്നിയതാണെന്നും ഇന്ത്യയുടെ യഥാര്‍ത്ഥ ശക്തി ഓരോ വ്യക്തിയുടെയും അന്തസ്സിലാണെന്നും അദ്ദേഹം കൂട്ടിച്ചേര്‍ത്തു.

രാജ്യസഭാ ചെയര്‍മാന്‍ എന്ന നിലയില്‍, പാര്‍ലമെന്ററി ജനാധിപത്യത്തിന്റെ ഉന്നത പാരമ്പര്യങ്ങള്‍ സംരക്ഷിക്കാനുള്ള ഉത്തരവാദിത്തം ഉപരാഷ്ട്രപതിക്കുണ്ടെന്ന് അദ്ദേഹം കൂട്ടിച്ചേര്‍ത്തു.

തിരഞ്ഞെടുക്കപ്പെട്ടാല്‍, നീതിക്കും സംഭാഷണത്തിനുമുള്ള ഉറച്ച പ്രതിബദ്ധതയോടെ എന്റെ പങ്ക് നിര്‍വഹിക്കുമെന്ന് പ്രതിജ്ഞ ചെയ്യുന്നുവെന്നും അദ്ദേഹം പറഞ്ഞു.