വികലാംഗ കുട്ടികൾക്ക് അധ്യാപകരെ നിയമിക്കാത്തതിന് സംസ്ഥാനങ്ങളെ ശാസിച്ച് സുപ്രീം കോടതി

ഡല്‍ഹി: പ്രത്യേക പരിഗണന അര്‍ഹിക്കുന്ന (വൈകല്യമുള്ള) കുട്ടികള്‍ക്കായി അധ്യാപകരെ നിയമിക്കുന്നത് സംബന്ധിച്ച ഉത്തരവുകള്‍ പാലിക്കാത്തതിന് സുപ്രീം കോടതി സംസ്ഥാനങ്ങളെയും കേന്ദ്രഭരണ പ്രദേശങ്ങളെയും ശാസിക്കുകയും കോടതിയലക്ഷ്യ നടപടി സ്വീകരിക്കുമെന്ന് മുന്നറിയിപ്പ് നല്‍കുകയും ചെയ്തു.

സംസ്ഥാനങ്ങളും കേന്ദ്രഭരണ പ്രദേശങ്ങളും തങ്ങളുടെ ഉത്തരവുകളും നിര്‍ദ്ദേശങ്ങളും പാലിച്ചിട്ടില്ലെന്ന് ജസ്റ്റിസുമാരായ ദീപങ്കര്‍ ദത്ത, അഗസ്റ്റിന്‍ ജോര്‍ജ്ജ് മാസിഹ് എന്നിവരടങ്ങിയ ബെഞ്ച് പറഞ്ഞു. നിര്‍ദ്ദേശങ്ങള്‍ പാലിക്കുന്നതിനെക്കുറിച്ച് മൂന്ന് ആഴ്ചയ്ക്കുള്ളില്‍ പ്രത്യേക സത്യവാങ്മൂലം സമര്‍പ്പിക്കാന്‍ ബെഞ്ച് അവരോട് ആവശ്യപ്പെട്ടു.

'ഏതെങ്കിലും സംസ്ഥാനം/കേന്ദ്രഭരണ പ്രദേശം അത്തരം സത്യവാങ്മൂലം സമര്‍പ്പിക്കുന്നതില്‍ പരാജയപ്പെട്ടാല്‍, അത്തരം ഓരോ സംസ്ഥാനത്തിന്റെയും/കേന്ദ്രഭരണ പ്രദേശത്തിന്റെയും വിദ്യാഭ്യാസ വകുപ്പ് അഡീഷണല്‍ ചീഫ് സെക്രട്ടറി/പ്രിന്‍സിപ്പല്‍ സെക്രട്ടറി/സെക്രട്ടറി അടുത്ത വാദം കേള്‍ക്കല്‍ തീയതിയില്‍, അതായത് 2025 ഓഗസ്റ്റ് 29 ന് ഹാജരാകുകയും കോടതിയലക്ഷ്യ നടപടികള്‍ ആരംഭിക്കരുതെന്ന് വിശദീകരിക്കുകയും വേണം' എന്ന് ജൂലൈ 15 ലെ കോടതി ഉത്തരവില്‍ പറയുന്നു.

ഉത്തര്‍പ്രദേശിലും മറ്റ് സംസ്ഥാനങ്ങളിലും പ്രത്യേക അധ്യാപകരുടെ കുറവ് ചൂണ്ടിക്കാട്ടി രജനീഷ് കുമാര്‍ പാണ്ഡെ അഭിഭാഷകന്‍ പ്രശാന്ത് ശുക്ല മുഖേന കോടതിയെ സമീപിച്ചിരുന്നു.

പ്രത്യേക പരിഗണന അര്‍ഹിക്കുന്ന കുട്ടികള്‍ക്ക് വിദ്യാഭ്യാസം നല്‍കുന്നതിനായി അനുവദിച്ച അധ്യാപകരുടെ തസ്തികകളുടെ എണ്ണം മാര്‍ച്ച് 28-നകം അറിയിക്കണമെന്ന് മാര്‍ച്ച് 7-ന് സുപ്രീം കോടതി സംസ്ഥാനങ്ങളോടും കേന്ദ്രഭരണ പ്രദേശങ്ങളോടും നിര്‍ദ്ദേശിച്ചിരുന്നു.